《想溝到女千祈唔好學我咁》: 12.2

我慢慢咁企起身，果陣已經驚到腳都震埋。

「你本書呢？」

「我...」

突然阿正將佢本書慢慢咁移到去我張檯，並且舉手講：「我冇帶書，佢借咗俾我睇。」

但主任點會相信呢啲大話，即刻行過嚟揭一揭本書，當發現本書其實寫咗佢個名就可以拆穿佢嘅大話。





可幸嘅係，阿正佢懶到出汁嘅性格，令佢連寫個名喺書上面作記認都懶。主任冇證據，就罰咗佢留堂，我亦可以順利參加選拔。我一直好想同佢講聲多謝，但佢成堂都擰開咗塊面，冇正面咁望過我。不過因為呢次嘅事，佢開始令我更加想認識佢多啲。

喺新學校嘅生活，原來都冇想像中咁難熬。好快我就搵到一班幾傾得埋嘅新朋友。佢哋都好樂意接受我呢個新同學，可能我個人都比較平易近人掛，哈哈！但唯獨是係阿正，唔知點解永遠我同佢講嘢，佢都係唔理我，無論我點去撩佢，佢都不為所動，如果唔係佢同果三個男仔平時都會講吓嘢，我真係以為佢有社交障礙症。佢唯一嘅喜好，就係成日會埋頭喺到寫呢樣寫果樣。有時我會偷睇佢喺到寫乜，發覺都係一啲短句，但往往呢啲短句，都睇到我好觸動。

我記得佢寫過：「當他來到這世上，所有人在笑，只有他在哭。待他離去後，所有人在哭，只有他在笑。」

「看見在滑石上攀爬的蟾蜍，便感受到生命的無力。」

「我們都是微塵，何以談起負上大責任？」





到底佢經歷過啲咩？先會寫啲咁灰嘅嘢？我亦都唔明白點解喺佢臉上掛住嘅，永遠都係愁眉苦臉，但無奈地佢完全冇同我講多兩句嘢嘅意欲。喺再冇同佢坐之後，更加冇再同佢講過嘢。成個初中生涯，雖然佢冇理會過我，但每當見到佢嘅時候，我都唔覺意會留意佢喺到做緊乜。

「你知唔知阿正佢點解成日一個人坐喺側邊唔出聲？」有一次我問阿柔。佢係我喺籃球隊嘅好隊友，因為追求佢嘅阿星係阿正嘅好朋友，所以我以為阿柔都會知少少。「唔知喎。」點知阿柔講。

「吓，你個阿星冇同你講過佢啲嘢咩？」我問。

「咩我個阿星啊！朋友嚟咋。」佢即刻澄清。

「人哋同你表白過咁多次，仲係朋友？！」





「欸...細個嘅嘢講笑㗎姐...」佢一直覺得阿星對佢嘅追求都係玩玩吓，所以都冇當過係真。

但命運嘅嘢好奇怪，纏開你嘅人會繼續糾纏住你，就算係毫無接觸嘅兩個人，時候到咗就自然有交集。上到高中，喺同阿正同班嘅同時，竟然可以一齊做班長。但佢真係一個好懶好懶嘅人！從來唔會點做班務，連Miss Lam乞求我哋幫手組建手球隊佢都拒絕！我都唔明點解佢可以咁絕情，望住我喺班走廊到做招募都仍然無動於衷。

比起任務失敗，令我更唔開心嘅係佢嘅冷漠。所以放學之後，我都忍唔住喺位到喊咗出嚟。

「喂，做咩喊。」見到我喊，佢竟然走過嚟問我。

「唔關你事…你個壞人。」

「今日收咗幾多個啊？」

「唔洗你假惺惺！」我真係好嬲呢個壞人！所以衝口而出講咗呢句說話。但其實我好怕，佢會因為我呢句說話而轉身就走。