《想溝到女千祈唔好學我咁》: 12.3

好彩佢冇走到不特止，仲肯幫我手搵隊員。佢真係一個好特別嘅人，連用嘅方法都好特別。一百蚊對我嚟講已經係好多嘅錢，但佢竟然可以毫不手軟地用嚟引誘同學嘅籌碼，最後只係用咗一百蚊就搵齊啲隊員，比起我死企爛企一日仲有效。

因為呢件事，意外地發現佢只係一個外冷內熱嘅人，而且仲俾我知道佢有因為我而聽Eason嘅歌！呢樣嘢真係令我好開心啊！由呢件事開始，我就更加留意佢，雖然佢係有啲小聰明，但喺生活上真係好似個小朋友咁亂曬龍，校服又唔識反好個領，又成日唔帶銀包返學，運動又唔叻，應該連保護自己嘅能力都冇。

「歐陽南啊下！你鐘意咗阿正！」有一次我同嘉慧、阿柔講起佢啲白痴嘢，阿柔竟然咁樣講。

「邊有！點會鐘意個白痴...」

「仲話冇？你嘴角出賣咗你啦，係咁偷笑！」嘉慧都笑我。





其實我都唔知我幾時開始鐘意佢，但當見到佢為我衝入更衣室搵聰聰、喺籃球賽為我打氣，當望到佢同阿月一齊我會有啲悶氣、甚至後來婆婆嘅事，我先發覺，同佢經歷咗越嚟越多嘢，佢喺我生活、甚至心入面所佔嘅位置就越嚟越大。我知道佢都係鍾意我㗎。所以即使聖誕節佢做好多好蝦碌嘅事，我都唔介意，仲好感動。因為佢由一個咩都懶得做嘅人，變到肯安排唔同嘅節目同我一齊渡過。

我真係覺得，同佢一齊應該會好幸福。

但點解...喺呢個時間要俾我睇倒果幅相？我最擔心嘅事真係發生咗。平時見到阿月望住阿正嘅眼神，我已經感覺倒佢對阿正有啲唔尋常嘅意味。

我唔明點解佢果頭話鐘意阿星，轉個頭又鐘意阿正，我覺得佢好難捉摸，不過平時佢對我哋嘅友善，又唔似係做戲。亦因為佢豪爽嘅性格，成日會一啲出人意表嘅事，滋潤咗我哋枯燥嘅校園生活。

但望住呢一幅相，我個心即刻好似碎咗咁，自從婆婆離開我、媽咪搵到新嘅男朋友，我以為我最可以依靠嘅就係阿正。我真係相信，佢唔會丟低我一個。但呢幅相嘅出現好似將我嘅憧憬都毀滅埋。





其實我知㗎，係阿月錫佢，阿正係被動嘅一方。不過我已經接受唔倒，要再同唔同嘅人分享我重視嘅人同物。

「愛情係兩個人嘅事，點容納倒第三個人？」

估唔到呢句說話，今日都應用倒喺我同阿正嘅關係上。我知咁諗係有啲自私，但之前阿柔同阿星嘅關係，唔係就係因為阿月嘅出現而翻起暗湧咩？

返到屋企，我一個人對住空無一人嘅屋企喊咗好耐，我好怕又會變返得我一個人。呢種感覺喺婆婆走果晚我感受過，我好討厭呢種感覺。一邊喊，阿正同我一齊嘅回憶不斷侵襲我嘅思緒，我發現，原來我好鐘意好鐘意阿正，我好想同佢講：「我好想做你女朋友，同你永遠喺一齊！」果一刻我覺得好無助，所以我去咗搵媽咪，媽咪一定係呢一刻最明白我嘅人。

但去到媽咪屋企，竟然見到媽咪遍體鱗傷咁攤坐咗喺地下。原來係媽咪個男朋友飲醉酒打成佢咁，個男人因為工作關係而成日要飲酒應酬，但每逢飲完酒就會動粗，而往往受罪嘅都係媽咪。





阿正曾經寫過：「看見在滑石上攀爬的蟾蜍，便感受到生命的無力。」

哈，俾佢講中喇，原來我同阿媽，就係佢句子入面嘅蟾蜍，無論點樣努力向上爬，永遠都唔會爬得上頂，永遠都會跌返落嚟。

我一出世就喺一個好窮困嘅環境長大，媽咪亦都好辛苦咁打兩份工維持生計。當佢以為再搵到一個對佢好，而且又唔洗為口奔馳嘅男人，估唔到最後都會受到傷害。

我有勸過媽咪離開佢，但媽咪話個男人唔飲酒嘅時候的確對佢好好，最重要係，個男人可以俾到好好嘅生活我哋，萬一離開咗佢，我哋永遠走唔出窮困嘅循環。媽咪為咗我生活好啲，唯有忍受種種痛苦。我唔忍心佢一個人面對呢種事，所以我一直喺屋企陪住佢，免得佢再發生咩事。