《想溝到女千祈唔好學我咁》: 12.1

其實我同阿正...即係壞人嘅認識，好大程度上只係一個意外。

好記得升中一果陣，阿媽因為太忙，將我升中學嘅嘢俾曬我阿婆去處理。但老人家所有嘢都唔係好識，原本我同好多小學同學都約好一齊揀定一間中學，睇吓可唔可以一齊考倒入去，但因為婆婆胡裡胡塗，以為將想入嘅學校填曬落表就得，結果將貪方便先揀入去嘅學校填咗落第一位，而攪完珠出嚟又真係俾我入咗呢間學校。

最後幾乎所有小學同學都可以入倒我哋原本揀果間學校，得我一個去咗一個新環境。聽聞果間學校係一間一條龍嘅學校，好多喺小學部畢業嘅同學都能夠直接升上去中學部。變咗喺開學第一日，大部分同學都已經有所識嘅朋友，而我，就一個人坐咗喺個角落頭。

我一路係咁四圍望，成個班房都好嘈，尤其坐喺窗邊果三個男仔，講嘢好大聲。佢哋一路喺到笑，話今日一定會有人遲到，仲特登冇留位俾佢，等佢冇得靜靜哋返埋位而喺成班同學面前出醜。

啲男仔真係好無聊，一諗到第時要同呢班無聊嘅男仔同班，就覺得好恐怖！去到班主任入嚟之後，都冇人肯坐我隔離，突然令我好驚，我唔知係咪我好醜怪，定佢哋覺得我係怪人，所以冇人敢坐我隔離。一諗起果班小學同學正好開心咁渡過開學日，我就好想喊喇。但唔得！冇理由第一日喺呢班新同學面前喊，咁咪好醜怪？





直至上堂聲響起，班主任打算閂埋門果陣，有個男仔喺門外大叫並且推實個門。

「第一日翻學就遲到？快啲搵個位坐低啦！」班主任好不滿咁講。

「Miss唔好意思，對唔住！」而果個男仔雙手合十，並且低曬頭咁不斷道歉。

當佢走向頭先果三個男仔果到，發現冇曬位之後，就好崩潰咁行去我隔離，成個課室淨返嘅座位，死死氣咁坐咗落去。

原來佢就係果三個男仔所取笑嘅人。





望到佢咁唔開心嘅樣，我就開始驚，係咪佢覺得坐咗喺個豬扒隔離，所以先咁失望？於是我就主動問佢：「Hello，我想問...我係咪有咩問題啊？」「咩...咩問題啊？」

「咁點解你好似好抗拒坐過嚟？」我好擔心咁問。

「我...同佢哋熟啲先想同佢哋坐之嘛，哈哈...」

咁都好啲！原來唔係我有問題！知道唔關我事之後，我就問咗佢叫咩名，先發覺原來佢就係果三個男仔笑緊嘅阿正。但佢個名真係好搞笑，好少人個名幾隻字個音都係咁沉。

「咁叫你壞人喇就！」

「你鐘意喇！」


呢個就係我同壞人，第一次嘅邂逅。

一路以為佢係一個好冷漠嘅人，但我諗佢都唔記得，佢曾經幫過我一次。

有次上堂嘅時候，我唔記得帶本中史書。教中史嘅係學校好嚴厲嘅訓導主任，一冇帶書嘅同學就會俾佢罰留堂。唔好彩嘅係，果日放學係籃球隊嘅新生選拔，萬一要留堂就會錯過喇！

「死啦...俾佢罰留堂咪冇得去選拔...」

原本以為坐喺最後，都可以側側膊，只要主任唔發現就得。但原來呢個世界真係有禍不單行，咁啱主任就叫中我問書。

「歐陽南，第四十頁第一段，讀俾大家聽下。」主任托起金絲眼鏡，一臉嚴厲咁望住我，似乎已經識穿咗我。