《想溝到女千祈唔好學我咁》: 11.11

「你唔覺得佢哋段感情好兒戲？」我問佢，當時我仲未明白「愛」究竟係咩一回事。

「因為失去咗安全感啊，雙方都冇信心，段關係就好難繼續行落去。但佢哋一定係深愛對方嘅。」佢答。

「咁能夠死埋一齊都算係對佢哋最大嘅恩賜。」我記得當時我都未好明白佢嘅說話，所以我選擇亂咁回應。

但而家我明白喇。

導致我同阿南挽回唔倒嘅結局，係因為佢喺我身上，已經搵唔倒果份對佢好重要嘅安全感，尤其佢婆婆過身之後，佢理應最可以依賴嘅人就係我，但我就一次一次咁令佢失望，壓垮埋佢最後一稞希望稻草。





但明白又如何，就算俾你睇通睇透所有嘢，偏偏就係挽回唔倒果樣對你嚟講好重要嘅嘢。

最後一個上學日，我就帶住對阿南嘅思念，趴咗喺檯到瞓著咗。瞓醒之後，就唔會再見到阿南，唔可以再望住佢嘅背影上堂，唔可以再睇倒佢著校服嘅可愛造型，更加唔可以再睇倒佢嘅笑容。

過咗今日，連同學嘅關係都失去埋，我哋之間就真係一啲關係都冇。

「喂！傻佬！」今次嘈醒我嘅，唔再係阿南嘅啜泣聲，而係阿月。

「嗯...」我仲係迷迷糊糊咁。





「做咩喺呢個班房瞓覺嘅？」佢當然唔知，我中一就係喺呢班讀。

「你又知我未走？」

「你書包都未攞啦，所以我就周圍搵你。」佢拎起我書包，好無奈咁講。

「咁...走囉？買嘢返我屋企食？」我問。

「好啊！我要食手撕雞飯！」同我相處得多，阿月嘅口味都變得平民化咗。





喺我離開嘅時候，先發現隔離檯寫住：「我都希望你記得，我哋分開嘅日子，你唔喺我身邊，我先至係最愛你。」

係阿南嘅字跡。「當年Last day...我見到你寫果句嘢。」諗返起句嘢，我膽粗粗咁向阿南提起。

「所以呢？」

「早知我唔瞓覺，咁就可以等到你嚟。」我苦笑。

「你冇瞓或者我就唔會入嚟。」

「咁你知道我係鐘意你㗎，點解頭先個樣好似好愕然，仲要咁樣奚落我？」我指當洛賓醉咗之後將我對阿南嘅感覺爆出嚟果陣。

「你知道嗎李卓正，咁耐以嚟你一句話鐘意我都冇講過。」

「我唔係唔想講，但好似每次想講嘅時候，就會遇到意外。」





「咁我又點會知道你真正嘅想法？」

「喺課室果兩句唔係已經講出咗我嘅心意咩？」「所以我唔明，係你白白由我喺你身邊走過。點解你係鐘意我嘅話但又唔捉實我？」佢嘅語氣仍然好平靜，但係一啲嗚咽聲已經反映咗佢正喺到努力壓抑自己。

「你知唔知道…我真係好嬲你？」佢追問。

「只要我有捉住你，你就會原諒我...？」

佢冇答，只係默默咁望住出面嘅星空。其實佢唔答，我都知道個答案。

「好多嘢都要講時機，錯過咗就冇。」佢講。

「係，可能我哋好多時就係時機錯咗。」我回應。





之後我哋就靜咗落嚟，我唔知佢諗緊嘅，係咪同我一樣，但我真係好後悔，好後悔冇留低佢，冇好好面對佢。

「呼。」佢好大力咁呼咗一啖氣。

「如果我話你知，呢一切都係我同胡一刀做嘅戲，我同佢從來冇一齊過，你會點？」

「吓？」