《想溝到女千祈唔好學我咁》: 11.10

「慧慧唔好意思！影相！」阿雄即刻望實鏡頭，睇嚟嘉慧真係佢所講咁，係一隻沙漠雄獅。

之後我哋就不停搵唔同嘅同學、老師影相，即使係一啲平時唔太熟，但都有兩句嘅同學。平日嘅人緣係點，呢一刻就顯示曬出嚟。好明顯我係人緣麻麻果班，因為好快我已經同曬想搵我，或者我想搵嘅人影相。

唔係...其實仲有一個。

但我估，佢應該都唔想同我影相喇。

而阿星當然係影相影到手軟嘅人，除咗因為佢平時吃得開嘅性格，同埋佢喺籃球隊都好受到隊友歡迎，佢同阿柔都喺籃球場，呢個揮灑過唔少汗水、青春，仲有令佢哋結緣嘅地方留低最後嘅回憶。





而於阿雄同洛賓就緊係搵佢班手球隊隊友影相，阿南同胡一刀自然亦喺人群之中。望到佢哋嘅互動，就覺得好搞笑，胡一刀仍然用果套「姑娘有禮」嘅客氣舉動對住阿南，好似唔敢做一啲太苟且嘅事咁。我不自覺都戥佢擔心，咁樣留唔留得住阿南㗎？

不過見到阿南咁開心，也罷。我一個人周圍喺學校亳無目的咁走嚟走去，因為要等仲未影完相嘅阿月。雖然佢嚟到學校只有年幾兩年，但都識倒好多朋友，更唔好講果班垂涎佢美色嘅狗公。

行行下發覺，喺到咁多年，從來都冇試過好似而家咁，咁想探索呢間學校每一個角落。原來好多地方都有唔同嘅回憶，而呢啲回憶好多都係開心嘅。唔通真係唔去到最後，都唔會發覺原來自己對學校有一份眷戀？

當經過中一果陣讀果個課室，都忍唔住走咗入去坐，我坐返喺果個近牆嘅後排位置，係我第一日返呢間中學嘅時候坐嘅位，亦係我同阿南認識嘅位置。

「我叫歐陽南！我哋做朋友啊！你叫咩名啊？」

「李卓正。」

「李..卓..正..咁橋口嘅，有冇第二個名啊？」

「冇。」

「英文名呢？有喇掛？」

「Ry…Ryan。」

「咁叫你壞人喇就！」哈，點解會諗返起果日嘅情境？腦海突然浮現返佢中一果陣嘅樣。果陣同而家一樣，佢都係咁鍾意紥住條馬尾，仲要條橡筋永遠都索到個頭實一實，佢話咁樣個頭就唔會亂。我好鍾意佢咁樣紥，因為可以好清楚咁望住佢個靚樣。

比起而家，佢中一果陣嘅皮膚比而家白好多，可能係因為佢成日都打籃球。所以後來曬到啲膚色都變到有啲黝黑。黑眼圈亦冇而家咁大，當時望落真係精神好多。

我一直以為自己果陣冇仔細望過佢，畢竟唔係好想睬佢。但原來佢嘅樣已經一早深深咁刻畫咗喺我腦海，一早喺我心底留低咗一個好重要嘅位置。

「希望妳唔會唔記得，我哋喺埋一齊嘅每一日，都係咁開心，我都係咁愛妳。」

我喺檯上面寫低咗呢句對白。其實我唔知寫嚟做乜，阿南都睇唔到。但總之我就係好想喺呢個地方，紀錄低呢句話。

呢句對白係出自我同阿南之前睇過嘅《玻璃之城》入面，當黎明同舒淇喺聚會完結之後講。阿南一直都好鐘意呢句對白，佢覺得好浪漫。