《想溝到女千祈唔好學我咁》: 11.9
原本以為阿星都會讓下我呢個新手，點知佢全程都放盡嚟打，我試過出盡力去防守佢，但我哋水準差得好遠，佢一玩下花式就輕易過咗我，其實根本得佢自己一個喺到打咁滯。
「洗唔洗啊星哥？」洛賓都忍唔住出聲。
「咪係...想打死人咩？」我喘曬氣咁和應。
「你哋有冇發覺，有啲嘢原來勉強都冇用？」阿星突然一邊射波，一邊問。
「你講咩啊？」阿雄問。
「就好似阿正你出盡力都贏唔倒我。」
「所以呢？」
「所以唔屬於自己嘅領域，就唔好接觸咁多。」佢答。佢呢排講嘢都好玄。
喺我仲苦思緊嘅時候，嘉慧同阿南走咗過嚟，話想一齊著住體育服影相。「慧慧我同你影先！」阿雄好唔知醜咁用把好嗲嘅聲線講。
「喂！傻㗎你，呢到好多人。」嘉慧好怕醜咁講。
「走啦走啦，呢到好曬。」洛賓即刻講，令到本來已經好難為情嘅嘉慧即刻發茅追住佢嚟打。
「喂，你哋唔好玩啦，真係影啦！」阿南叫停佢哋，把聲仍然係咁溫柔。
唔知係無意定有心，我同佢企開咗兩邊咁影，喺影之前，佢突然大叫：「阿月！一齊影相！」
「喔？」喺球場另一邊嘅阿月，正喺到同其他同學打緊排球，聽到阿南嘅呼喚，佢下意識地望一望我，見到我點點頭，就即刻跑過嚟。
佢跑過嚟果陣，胸前果兩舊肉不斷上上下下咁晃動，個畫面好衝撃。
「嘩...會唔會太大...對眼？」洛賓望到實一實咁問。「係咪想死？」我將兩隻手指放到佢眼前，佢再望多一眼我就果斷咁插落去。
「三、二、一！」阿南揸住相機，倒數完就一連影咗幾張相。
「搞咩啊，李卓正你影親相個樣都咁呆滯嘅？」喺睇返啲相果陣，阿南突然Cue我出嚟笑。
咁係因為，當佢影相果陣，我就因為阿南嘅舉動而心不在焉。
我估唔到阿南會主動叫埋阿月一齊影，咁係咪因為佢唔再介懷我哋嘅嘢？果一剎那我好想個答案會係：「唔係。」，咁就代表佢仲係緊張我，介意我同阿月嘅關係。
咁樣諗好似係好衰，尤其係對阿月嚟講。我都明白有時有啲諗法係唔應該出現，但就算我係咁壓抑住自己呢個諗法，都唔代表呢個諗法唔存在。
而佢突然咁樣提起我，好似喺到向我強調緊佢已經冇曬事，呢一種刻意令我好失落，我好想離開呢一到，好唔想面對呢種越係拉近，距離就越遠嘅生疏感。
唔通我哋嘅關係，淨係淨低呢種充滿尷尬嘅寒暄？「怕醜啩。」但講到尾，我都係配合咗佢嘅刻意，苦笑咁回應。
「吓，喺到都怕醜？」好唔識做嘅洛賓撕開我努力作出嘅掩飾。
「我都明嘅，有個咁大...方美麗嘅阿月企喺隔離，又真係會怕醜嘅。」阿星好機智咁為我解圍，或者佢之前唔太支持我同阿月距離太近，但都唔忍心我喺阿南面前出醜。
「真啊，對望多一眼都即刻俾佢電暈。」我和應。
「口花啦你，咁樣讚人都有嘅。」阿月笑到好冧咁講，仲不自覺將個頭依偎咗落我到。
唔好諗咁多啦李卓正，阿南係人哋女朋友，終於明點解呢句說話往往會令講嘅人咁崩潰。
今個星期唔同嘅堂都陸續結束，繼體育堂完咗之後，到唔同嘅選修科完結、最後到主科...最後到上學日都係。好快，已經到咗最後一個上學日。「估唔到三年咁快就過咗，想當年我都係初嚟報到，好彩遇到你哋，有你哋做我第一批學生，我好榮幸。」Miss Lam喺到發表佢嘅最後講話。其實唔止佢，我哋都好感謝佢，係佢令我知道唔係所有老師都只係為逗份糧而工作，都有老師會支持學生、關心學生。亦因為佢，所以阿雄同洛賓先搵到自己嘅價值，佢哋喺Miss Lam帶領嘅手球隊之下，真係成熟咗好多。
「Miss Lam唔好咁講啦！我哋好彩有你就真。」阿南講，然後就喺身後攞咗張心意卡出嚟送俾Miss Lam，我哋每個學生都寫咗一啲話俾佢，所以佢收到之後都有啲眼濕濕咁。
「係啊Miss Lam，到時同龍Sir結婚記住請埋我哋啊！」洛賓大叫，難得佢會講啲好說話。
可能呢一刻，係我哋人生中最後可以咁真誠相對嘅時候，每個同學雖然唔係兄弟姊妹，但彼此感情都算係過得去，至少都係願意交心。喺離開中學之後，就好難再有呢啲真心相待嘅群體，開始會混集好多功利、欺騙、或者計較。「友誼長存啦。」我同阿星佢哋三個，圍咗喺一齊影一幅相。果陣時嘅我哋，當然唔知道大家日後仲會有好多相聚嘅時刻，所以都特別珍惜呢個影相嘅時間。
「好彩有你哋做我兄弟。」阿雄甚至講出呢句咁肉麻嘅說話。雖然佢平時唔係好多嘢講，亦係我哋之間比較平凡嘅一個，但我哋都知道，佢係最重視我哋嘅一個。
「頂你，洗唔洗眼濕濕？」阿星不斷用手掃阿雄個頭。自從同阿柔拍拖之後，佢真係成熟沉穩咗好多。佢話係為咗唔想激嬲阿柔，所以咩事都會諗好多後果，再揀一個最貼近阿柔想法嘅。呢一個車震星2.0，更加似我哋四個之間嘅領袖。
「我先要喊啦，估唔到要A0 Grad。」洛賓依然講嘢都係咁直接，但呢個其實都算係佢優點，至少唔洗收收埋埋，雖然有時真係會得罪好多人，但如果我同阿星當初可以好似佢咁直截了當，就唔洗將子晴嘅事收埋咁多年，就唔會搞到佢喺咁多年之後又唔開心多一次。
「你哋唔好咁婆媽啦，幾個男人要見有幾難？」揸機嘅嘉慧好唔耐煩咁講。