《想溝到女千祈唔好學我咁》: 11.8

「點啊，同阿柔相處成點？」有一日放學，得返我同阿星走，好耐都冇試過得返我同佢走，唔知點解個感覺有啲奇怪。

「幾好，好彩堅持咁多年係正確。」

「咁就好，一定要幸福落去。」

「咁你呢？放低咗阿南？」佢突然問。

「我放唔放低都好，佢都放低咗。況且而家咪幾好，有個比我更加識愛佢嘅人喺佢身邊。」





「咁你同阿月呢？一齊咗？」

「冇啦。雖然佢真係個好好嘅人。」

「真係好？」佢似乎話中有話。

「點解咁問？」「我怕你因為一啲失落嘅情緒而產生一啲錯覺姐。」

「痴線，你都有眼睇，唔係佢喺我身邊一直陪住我，我可能唔會捱得過呢一關。」





「點都好啦，有咩事都好你都仲有我哋。」今日阿星講嘅嘢好奇怪，好似對阿月有所懷疑咁。

我唔覺得我有啲咩可以令阿月花咁多時間去爭取，更加唔好講俾去呃。而且佢對我真係好有心，佢每日都會諗好多嘢去氹我開心，有時會整啲小手工、有時會自彈自唱，總會有唔同嘅驚喜。

佢仲會不斷督促我溫書，比我父母更加緊張我嘅學業。

「放心，我一定會考倒大學。」為咗令佢放心，我更加喺佢面前發誓。

「我冇懷疑過你啦。」





喺佢身上我搵到一份以前喺阿南到搵唔倒嘅需要。我需要阿月陪伴住我，我唔想再失去我重視嘅人。我相信阿月，所以阿星嘅說話，我好快都拋諸腦後。「我哋唔喺屋企之後，你哋就要睇住呢到啦。」真係笑死我，有日失驚無神阿媽竟然提出要同老豆去歐遊，結果唔夠三日，就已經準備好所有嘢出發。

「好好玩返夠本啦。」望住企喺門外嘅佢哋，一陣幸福嘅感覺油然而生。佢哋終於要開始佢人生快樂嘅下半場。

「竟然掉低我一個，真係不負責任。」

「咩啊，你有我喎！」阿月攤喺梳化睇電視，就好似個女主人咁。

「你喺到咪要我照顧埋你，咁我寧願一個人。」

「死啦你！」佢將個咕𠱸掟去我到。

「你可以留喺到咩？唔怕你阿爸話你？」佢屋企人當然唔會知道我同佢成日一齊，而符文安亦都意外地肯幫我哋守秘密。

「所以唔得㗎，一陣就要走。」聽倒佢要走，就突然有一陣失落。「唉喲傻豬仔，唔捨得我啊？唔係話寧願自己一個咩？」佢係咁撩我下巴，好似逗緊隻寵物咁。





「講吓之嘛...」

「我每日都上嚟陪你好冇？」

「咁都好...」

結果佢每日都有上嚟陪我溫書，準備考試，但仲慘過灰姑娘，每晚大約九、十點就會走。

「你覺得咁樣好咩？一路瞞住佢哋？」直至一段時間之後，我終於忍唔住問。

「咁都冇辦法㗎，唔係嘅話我哋連見都冇得見啦。」

「唔辛苦咩？你可以有你自己嘅生活㗎喎。」





「唔會啦，我好開心啊。你已經成為我生活嘅一部分啦。」

「嘩，乜而家啲女仔講嘢咁張狂？」我特登同佢鬥氣。

「好笑啊？！」佢怕醜起上嚟就扭我隻耳仔。每次望見佢俾我激嬲嘅樣，都好搞笑。佢每次反應都會好大，我諗係因為同佢比較放得開嘅性格有關。同阿南相比，阿南永遠都係比較內斂，所以每當有咩事，阿月都會將所有情緒畫曬喺個樣，而阿南就會隱藏得好深。

唉，點解又會諗起阿南？

即使我明白我哋已經各自有我哋嘅生活，但每當佢出現喺我眼前，我總係會忍唔住咁去望下佢，或者佢上堂時，望出窗發呆嘅背影會係我成個學生生涯最難以忘記嘅一幕。隨住越嚟越近嘅公開試殺到，就代表我可以再望到呢個背影嘅機會都越來越少。

「你哋今日，自由活動啦，我都冇咩好再教你地。」喺最後一個體育堂，阿Sir都破例地一開始就俾我哋自己打波。以往都係坐埋一邊，好少會同佢哋一齊玩嘅我，今日竟然想玩吓籃球。

「喔，稀客喎。」阿星一邊拍住個波，一邊對住我講。

「識你哋咁耐都未同過你哋打波，今日想試吓咁囉。」





「嚟啦咁，我同阿雄一隊。」阿星將個波拋俾我，之後講：「讓你哋開波先。」