《想溝到女千祈唔好學我咁》: 11.7

第一次面對我老豆，阿月竟然有啲唔自然。

或者佢老豆俾佢嘅刻板印象實在太深。

「阿月，我老豆。」我將佢哋介紹俾對方認識。

「阿月啊，多謝你陪咗阿正咁耐。」老豆維持佢一貫嘅斯文作風。

「唔…唔洗客氣。」





「下次我哋再請你食飯，但Uncle今日有啲攰喇，阿正你記得送人返去。」

「Uncle你辛苦喇。」喺走之前，阿月微微咁鞠躬。

「下次再見。」

喺我哋離開嘅一剎，我喺門外嘅窗見到老豆正攞住阿媽張相凝望住，兩行眼淚亦隨住流落嚟，呢個畫面真係令我好肉赤。「呼，你阿爸都幾好人啊。」阿月鬆一口氣講。

「佢係世界上最好嘅老豆。」我答。





第二日，我返返吓學嘅途中，老豆Whatsapp我話阿媽已經醒咗，興奮到我即刻去搵阿月同佢講。

「咁實在太好！我哋放學去探佢喇！」

「嗯！」呢個算係，我近嚟難得嘅好消息。

一放學，阿月嘅司機已經車我哋去醫院。

「媽！」躺喺病床嘅阿媽反應有少少遲鈍，老豆話係因為啱啱醒嘅關係。





「媽！對唔住！咁多年嚟辛苦你。」我捉住佢隻手講。

阿媽雖然唔太講倒嘢，但臉上嘅眼淚已經話咗俾我知，佢好感動。

「傻…仔，阿…阿媽唔辛…苦。」對於我哋嚟講，阿媽就好似一架隨時會開走嘅火車，所以我哋都好把握時間，盡量爭取同佢生活多啲。

喺佢出院之後，佢亦正式搬返嚟屋企，我哋三個，終於可以齊齊整整咁一齊生活。阿媽搬返嚟之後，屋企真係有生氣好多，原來阿媽係個好幽默風趣嘅人，加上驚為天人嘅外貌，唔怪得後生嘅時候會迷倒咁多男仔。

而且佢最迷人嘅係，佢同阿南一樣有一對好晶瑩剔透嘅大眼睛，雖然冇攝人心魄嘅魔力，但就令自己冇辦法喺佢眼中移走。

嗯…講起阿南，我仍然都成日會諗起佢。但時間真係一隻好有效嘅藥，我好似真係開始慢慢淡忘對佢嘅思念。其實都唔可以話淡忘，應該係話，將對佢嘅愛封印咗喺心底。

因為我知道，我永遠都唔會忘記倒佢。

只要佢開開心心，而胡一刀對佢好，我諗已經好足夠。





喺阿媽出院之後，我哋真係兌現倒承諾，一齊去咗燒嘢食，亦有叫埋阿月。之後，阿媽逢親有咩家庭活動都會叫埋佢，佢哋甚至熟稔到會一齊去行街、覆診。唔知以為阿月先係佢嘅女。「阿月係好女仔，記住唔好再錯過。」老豆叮囑我，佢竟然用個再字。

其實我點會唔知佢好？就係因為佢好，我先唔想辜負佢。同我呢種人一齊，盞成為佢嘅負累。

「Yes！嘉慧話肯嫁俾我！」有一日，阿雄突然拋下呢個震撼彈。

「吓？咁快？你搞大咗人哋個肚啊？」我問。

「搞你個頭，佢話佢當我係結婚對象姐。」細個果陣，我哋好容易就會因為呢啲同伴侶訂下嘅諾言而興奮同期待，但大個之後先知道，其實呢啲只係不負責任嘅諾言，往往做倒嘅人少，反口嘅人多。

「恭喜曬喎，到時請飲記住叫埋我。」洛賓好淡然咁講。

「預咗你幾個做兄弟啦！」但唔知點解，果陣嘅我哋雖然唔知未來會係點，但就好相信呢一日一定會來臨。好彩當時冇亂潑冷水，唔係實俾人鞭屍鞭足一世。





「唉，你哋個個都一雙一對，而家得返我一個單身狗，連胡一刀都...」洛賓講。

洛賓、阿雄同胡一刀，冇因為我同阿南嘅事而有所避忌，喺球隊仲係好好嘅隊友。全靠佢哋，我先知道胡一刀真係一個光明磊落嘅人，阿南可以同佢一齊，我都好放心。

....雖然我都已經冇資格再講放唔放心。「喂！係咪又要彈開？」阿雄成個筆袋車落佢到，示意佢收聲。

「我冇嘢喎，舊嘅唔去邊會有新嘅？」我望住阿月講。

「咩啊，當我衫啊？」佢篤一篤我魂精咁問。

唔知幾時開始，我同阿月就一直維持住呢種曖曖昧昧嘅相處，一直都冇踏出多一步去發展進一步嘅關係。

「放心啦洛賓，我哋唔會丟低你咁衰嘅！」阿月對住洛賓講。

「月姐你真係個好人，嗚嗚嗚。唔似得果個莊偉雄，有異性冇人性㗎啦。」洛賓扮喊咁講。





「你咁講㗎！上次同嘉慧去打羽毛球都有叫你。」阿雄即刻否認。

「係嘉慧叫多咗個Friend先要我去戥腳之嘛，仲要係仔嚟。」洛賓篤爆咗佢，阿雄即刻無聲出。

「咁你就唔啱啦。」我笑阿雄。

當我哋為阿雄嘅事而高興嘅時候，有一個人反而冇出聲。