《想溝到女千祈唔好學我咁》: 11.5

佢真係好好，好到我唔明白我有咩嘢配得上佢嘅付出。

理智上我都知道對佢好唔公平，我好似生出嚟就為咗不斷傷害對我好嘅女仔咁，早知係咁，我情願從來冇對女仔嘅印象改觀，一直同所有異性保持返距離，咁至少，都可以傷害少兩個女仔。

但我亦冇任何時間同精力去處理同阿月之間嘅事，因為好快就嚟到阿媽做手術嘅日子。

「媽，冇事。瞓醒咗我哋就可以再一齊傾偈。」去到做手術果日，我喺手術室門口鼓勵阿媽。

以前成日會覺得呢啲對白好老套，每個家屬都係咁樣同啲病人講。但原來「希望」對任何人嚟講真係好重要，總之要令佢哋相信，自己有意識咁入手術室，就都要有意識咁醒返。





喺呢段日子，我同阿媽嘅相處都好融洽，雖然未至於追得返冇咗嘅時間，不過都係一段可以令佢支撐到而家嘅快樂回憶。

「老豆你都要加油。」我答，掌握住自己愛人嘅生死，我冇辦法想像佢嘅壓力究竟有幾大。其實醫院一直唔建議主刀幫自己親人做手術，但喺阿媽再三堅持下，老豆都係揹起咗呢個重擔。

手術室外嘅紅燈著咗，代表手術開始進行，手術室門外除咗我之外，仲有果個男人，同埋阿月。

「放心喇，唔會有事。」阿月坐喺我隔離，鼓勵住我。「多謝你。」我衷心咁講。

「你再同我咁客氣我就打死你。」佢扮到好惡咁講。





「哧，阿媽話過如果佢冇事，就同我哋去燒嘢食。到時…預埋你？」我問。

對於我突如其來嘅邀請，佢好似有啲驚訝，但好快就點曬頭咁答應。我知道我唔係乘一時口快，而係真心咁向佢發出邀請。

時間一分一秒咁過，阿媽應該喺裡面瞓得好淰，但手術房外嘅時間，每一秒都過得好煎熬。

「阿正。」唔知係咪等得太辛苦，個男人竟然走過嚟撩我傾偈。

「我哋應該冇嘢可以講？」對住阿媽，我仍然可以寬宏，但對住呢個陌生嘅男人，我百分之百唔可以容忍佢所做嘅嘢。





「正…」阿月搭住我手背，擰曬頭，示意我唔好咁無禮。「我知你好憎我，但你可唔可以唔好怪你媽媽？」

「關唔關你事？」我問。

「我諗你都有權知道件事，當年你阿媽同我，唔係，咁多年嚟佢同我其實都冇你哋所諗嘅舊情復熾。呢個只係佢離開嘅藉口。今次嘅腦癌根本唔係初患，而係復發。」

「你講咩話？復發？」

「喺佢離開你哋之前，佢已經發現自己有病，所以先搵埋我做場戲呃你哋。目的就係唔想你哋因為佢而傷心。」

唔想我哋傷心，就要我哋討厭佢一世，呢個係咩道理？我唔明白。

「或者天意弄人，喺佢以為自己會死嘅時候，又可以好得返。但佢已經無面目再去搵返你哋。其實咁多年嚟佢都係好記掛住你哋兩父子。所以即使我同佢相處咁多年，佢都冇再對我有任何情感…」

「痴線㗎你？作得就作？拍劇啊？」我對住個男人大罵發泄。你估我唔知佢係講真話？但你要我點接受倒，原來咁多年我哋都錯怪咗阿媽？我哋嘅憎恨亦會隨時間而丟淡，但阿媽一直都一個人承受所有痛苦，包括對我哋想見不能見嘅掙扎。我試圖抑壓自己嘅情緒，但越係壓抑，就越俾悔意反噬，我真係好想將自己打死。





「今次復發可能真係盡頭…」個男人繼續講。

「老豆都知？！」我問。

「知，睇返病史嘅時候已經知。但你阿媽都唔想將真相俾你知道。本來佢都好想好似上次咁，一個人默默咁離開，係我勸佢，佢先肯搵返你阿爸。我知道，如果到最後佢都冇搵返你地，就算離開都會帶住遺憾。」

「痴線，痴線啊你！食錯藥發噏風！」我轉身離去，唔想再聽佢講嘢，佢講嘅每一句，都好似一個個重拳咁撃倒我嘅心房，換成物理傷害嘅話，我已經俾佢打到皮開肉綻。

「正！正！」阿月一直緊追住我，直至跑到我面前。

我突然諗返起老豆講過嘅嘢。

「咁如果再俾你見返佢呢？會唔會同佢講嘢？」

「我諗唔會喇，有咩好講，大家都唔了解對方嘅生活。」

「如果佢唔係你諗咁樣呢？」

「即係點？」

「哈算啦，當我冇講過。」

做咩唔一早話我知！點解所有嘢我都係最後一個先知道？