《想溝到女千祈唔好學我咁》: 10.11

「咁我都知...」佢嘅意思，即係暗示已經從阿柔嘅口中得悉阿南嘅取向，無疑對我嚟講係一個更大嘅打撃。

「當上一課啦，知道自己有幾唔成熟。」阿雄拍一拍我講。

「唔緊，有我陪你，一齊單身，笑死呢兩個女友奴。」洛賓指住阿雄同阿星答。

「嗤，我想俾你笑埋一份多啲。」我苦笑，但其實內心係充滿感激。

「死啦你。」





嗯，完了吧，如無意外。

冇可能。

雖然一切回到中一，大家唔再有交集嘅階段。

但發生咗嘅事，又點會可以咁易唔記得？只要喺見到佢嘅地方，我嘅視線仍然離唔開佢，一直期待，大家可以對上一眼。如果真係好似佢所講，以前佢成日咁樣望住我，唔知佢果陣有咩感覺？幸好嘅係，佢真係好快就變返以前咁活潑、開朗，臉上亦重現返果個好令人心暖嘅笑容。只係，我已經失去擁有呢個笑容嘅權利。不過咁都好，證明佢可以重新生活。唔會再拘泥於同我過去嘅難堪回憶。

「喇，暑假之後大家就要認認真真讀書喇，要好好準備公開試。」喺中五最後一日返學，Miss Lam好語重心長咁講。





本來以為中五可以好轟轟烈烈咁過，令自己中學生涯變得無憾。本來以為會有一場好難忘嘅戀愛，令自己嘅人生有一個新嘅體驗。

點知去到最後，都係變返好似當初咁渾噩，咁得過且過。

「溫書喇，想裸考就算？」阿月問。我哋依然保持住喺圖書館睇書嘅習慣。以前真係睇書，但而家，係因為望出窗外，正正就係手球隊練習嘅地方，咁就可以望多阿南一陣，望住佢好努力咁為球隊打氣、管理。

「考唔考得好都係差唔多姐，溫嚟做乜？」

「你咁樣積積埋埋到公開試就好辛苦喇。」「到時就會溫㗎啦。」我依然望住窗外，心不在焉咁答。





「你有冇諗過大學揀咩科？」阿月問。

「冇喎。」

「咁Jupas 呢？填咗咩？」

「求其揀咗幾科穩入嘅科。」

「你點解要咁樣放棄自己姐？明明你嘅成績都可以入好多幾好嘅科。」聽到我咁散漫咁答，佢沉唔住氣咁問。

「讀完咪又係出嚟做社畜，攞到張沙紙就夠啦。」

至於做作家，我覺得已經失去咗寫好一篇文章嘅靈魂，寫唔倒好嘅文章，仲有咩意思。

「你講大話！明明就係因為冇咗阿南而唔肯努力。」佢篤爆咗我。





「痴線，佢影響力冇咁大。」我否認。

「既然你心入面冇佢，咁你可唔可以當為咗我而上進啲啊？」

「不如咁講，你可唔可以為咗我而唔好再理我？」我反問。「唔得！」佢好堅決咁答。「除非令你愛上我！」

「更加冇可能。」我回應。

雖然佢喺我身邊嘅日子，見住佢為我嘅消極而灰心，用盡所有方法去支撐住我，有陣時真係會令我有一啲觸動。但我知道，一日忘記唔倒阿南，阿月都只會係阿南嘅替代品，我都冇辦法可以百分之百將自己投入喺對阿月嘅感情上。

為咗令佢嘅熱情冷卻，有時我更加好絕情咁對待佢，就好似對初相識嘅阿南咁。但或者有人喺我身邊煩一煩，先提醒倒自己其實仍然生存緊。

「我唔會放棄。」佢抿一抿唇，然後好堅決咁講。





「你鍾意喇。」

呢個就係點解我同阿南最後都冇一齊，而且仲要喺訂婚Party上受到千夫所指嘅原因。唔係我唔想令阿南清楚我嘅心意，而係一切就好似一個蝴蝶效應咁，當中其實有好多「有彎轉」嘅機會，譬如如果可以平心靜氣咁同阿南解釋清楚，甚至再退多步喺聖誕晚會唔同阿月單獨傾偈，或者都會引領到去一個好啲嘅結局。但就俾我一手將統統能夠改變局面嘅機會破壞曬。