《想溝到女千祈唔好學我咁》: 10.10

聽倒我咁講，佢有啲愕然，但仍然慢慢咁行過嚟，舉起我隻手，放咗喺佢胸前，再施少少力，令我揸咗落去。加上衣服同乳房之間有一層胸圍嘅阻隔，我好切實咁感覺到一層柔軟。

「啊...」佢輕吟咗一聲。

「你想嘅話...可以…啊～。」佢好怕醜咁講，眼神亦都唔敢直視我。

「痴線。」我即刻鬆開手，我當然冇想同佢上床嘅衝動，頭先講嘅都係一啲意氣說話。

佢將我攬入佢懷裡，眼淚一滴一滴咁滴落我個頭到。





「我當然知你唔會，但係我想你知道，你仲有我啊，就算你鍾意嘅唔係我。」佢喊住講。

聽倒佢咁講，我亦再忍唔住我嘅眼淚，就好似放題咁不斷流，呢幾日一個人喺屋企真係好辛苦，我好想搵人傾訴，好想俾阿南知道，我真係好掛住佢，每次舉起電話，都好想搵佢。但我始終冇勇氣，再去搵呢個俾我傷害得咁深嘅人。「我會再嚟搵你，你唔好避我啊！」阿月臨走之前講。

「得啦，呢到我屋企我去得邊？」將所有情緒抒發曬出嚟後，感覺真係舒服好多。

「咁又係，再見！」

之後，佢真係成日都上嚟搵我，好多時都係坐喺廳睇唔同嘅電影。而作為回報，我都應承同佢去街。佢去嘅地方，估唔到又幾貼地，我哋會去機鋪、唱K、行山，我面前嘅佢就好似一個貪玩嘅小朋友，完全抹除初初識佢嘅時候果種高傲嘅感覺。





確實，有佢喺身邊，胡思亂想嘅時間少咗好多，從而令心情都冇咁鬱結。我知可能有啲衰，利用佢嚟沖淡對阿南嘅思念。但呢個，可能已經係我淨低可以濫用嘅方法。

而除咗佢之外，阿星佢哋都有定時同我見面。

「知唔知阿南點？」每次見到佢哋，我都忍唔住問。

「好似開始有返啲笑容，同埋會同返人傾偈囉。」阿星答，知道佢過得幾好就足夠。隨住兩個星期嘅限期越來越近，果種不安感開始湧現，萬一真係俾人踢出校，咁我身邊嘅一切就真係會消失。

「放心啦，你會冇事。」阿月答。





「你又知？」

「可能我信好人有好報？」

「我真係好人咩？」

「嗯...即使你唔係，但已經盡咗力令自己係。」

「呢個係安慰嚟？」

「你當係啦。」

果然，一如阿月所講，符家果兩父子態度開始軟化，最後只係需要記一個大過，兼寫悔過書就可以。

但比踢出校更難受嘅係，要喺學校面對住阿南嘅冷漠。





即使我去到邊，只要佢見到我嘅出現，佢都會即刻調頭走，莫講話道歉，連一隻字我都冇機會對佢講。更慘嘅係，學校褫奪咗我嘅班長資格，連唯一可以同佢溝通嘅渠道都失去埋。「各位兄弟，我可以點做？」無計可施之下，我都係搵返幾個兄弟幫手。

「嗯…難幫。阿柔話阿南今次好決絕。」阿星答。

「點解呢？」洛賓問。

「我囉，講咗啲好過份嘅說話。之後佢就真係冇理過我。」

「軟嘅唔得，咁就隔硬嚟啦！捉實佢同佢講清楚囉！」同嘉慧一齊之後，阿雄果然承繼咗佢嘅硬派作風。

「得咩？我驚佢叫非禮都似。」我答。

「佢係鐘意你仲點會咁講？」阿雄堅持。





「又係啊可？」唔知痴咗邊條筋嘅我，竟然覺得佢又講得幾有道理。原來，愛情真係會令人沖昏頭腦。以前會覺得呢句嘢好戇居，但而家因為阿南，我已經失去所有理性。結果，我真係喺學校門口，等佢出嚟。

當佢見到我嘅時候，望咗一望就掂行掂過咁繼續行，就好似望住一個陌生人咁。

「捉實佢啊！捉佢啊！」我聽到內心嘅聲音，一直催促自己，唔好放佢走。

但偏偏，我做唔出。

去到最後，我都唔想再做一啲會令佢痛苦嘅事。

當捉實佢，佢掙扎，會痛。

繼續諗起我，記返起我對佢嘅傷害，一定仲痛。

「算啦，或者慢慢遠離佢嘅生活，對佢嚟講先係最好。」我對住三個兄弟講。





「唔支持，但尊重。」阿星答。

「有得揀我都唔想。」我答。