《想溝到女千祈唔好學我咁》: 10.7

「你快啲，快啲，幫我同阿南解釋返。」我拖住疼痛嘅身軀，拉住阿月講。

「等等…等陣啊。」

「仲等啲咩？！呢個禮拜我等夠啦！」我好難受咁講。一直以嚟，我以為任何事我都可以好理智咁面對，仲成日會覺得啲人只係小事化大。當日我可以好理智咁阻止阿星打符文安，但今日失去控制，忍唔住出手嘅反而係我自己。

原來喺困窘面前，我係咁脆弱。

「你拉到我好痛啊！」阿月甩開我隻手，眼淚開始流出嚟。





「我一直被我老豆困住，唔準同外界聯絡啊！咁我點搵你啊？」佢向住我大喊。

「你又話我可以脫離佢控制嘅？點解唔得…點解唔得…」佢喺我懷抱中不斷咁喊，雙手不斷好無力咁拍打我心口。

一直我都覺得自己先係最無辜同最慘嘅受害者。但而家先知，阿月受嘅折磨唔會比我少，或者仲多我好多。

原來我嘅鼓勵，亦無形中傷害咗佢，令佢喺希望中等待到更大嘅絕望。我同佢一齊返到課室，成個班房嘅人都唔敢出聲。Miss Lam亦好罕有咁變得嚴肅。喺我返埋位後，隔離嘅洛賓亦都細細聲同我講：「Miss Lam話，你一陣要落校長室。」

「預咗。」





「啪！」Miss Lam突然雙手好用力咁拍張檯。

「阿正出一出嚟。」佢講完之後就出咗班房。

「你要唔要解釋一吓點解打人？」出到去後，佢問。

「我冇嘢解釋。」可能，我仍然覺得自己冇打錯人。

「我知你唔係咁衝動嘅人，無論因為你係我學生，定阿龍成日喺我面前講你嘅好說話。但你知唔知今次你得罪嘅係符文安，我好難幫你撐。」佢答。





「Miss Lam，我知道你嘅難做，我會承擔返我嘅責任。」「你覺得我係怕難做咩？教書只係一份工作，最重要嘅係你哋每一個學生。我只係唔想你嘅前途就咁完，人哋可以報警㗎。」

「係因為佢放上網果張相，係因為佢侮辱我哋嘅女同學。但就算我話你知又如何？佢嘅錯容乜易俾人抹走？只要佢乖乖Delete張相，對校長講句對唔住，聽日仍然可以喺學校吔文吔武。我明白個世界係咁唔公平啊，所以我都唔會作太多掙扎。」我答。

Miss Lam將手托住頭沉思，隔咗一陣佢只係嘆咗一句：「唉。」

「正，老師欣賞你有承擔。記得中四嘅時候你仲係一個軟皮蛇，咩都卸曬膊咁，到而家有咁嘅轉變，點都好，我都會支持你。」

「多謝老師。」能夠有呢個班主任，我已經好心滿意足。

喺小息嘅時候，我行到校長室門口，但躊躇咗好耐都唔敢敲門。

「喂，我哋喺到支持你啊。」阿星佢哋三個突然喺我後面出現。但我望向周圍，仍然冇阿南嘅出現。不過，只要有佢哋三個喺我身邊支持我，都足以令我面對任何困難。

「會冇事。」阿雄講。





「嗯。」入到校長室，就見倒符文安好似大爺咁坐咗喺梳化，仲有一個油背頭嘅中坑背對住我。睇佢著得身光頸靚，唔洗審都知係符文安個老豆。

「校長。」永遠只會喺早會先出現嘅校長，而家成個人坐喺我面前。

「啊…啊…啊同學。」好似我呢啲低存在感嘅人，校長又點會記得我。

「想問吓你點解冇啦啦出手打符同學呢？仲打到咁傷？」

「校長，我知錯。我願意承擔所有責任。」我唔想嘥時間為自己護航，從我行入去果一刻開始，望到校長嘅神情已經知道佢企喺邊一方。

「承擔？你承擔得起咩？」中坑出聲，但由頭到尾都冇望過我講嘢。喺佢眼中，我當然唔值得俾佢望。但喺我眼中，佢都只不過係狗眼看人低。