《想溝到女千祈唔好學我咁》: 10.6

「我願意啊！我願意啊！你聽唔聽倒？」一睇完封信，眼淚就控制唔住咁不斷咁流，無盡嘅自責感同懊悔不斷喺四方八面咁湧出嚟。

點解佢對我咁好，而我就傷害咗佢？

我不斷咁打俾佢，甚至Whatsapp留咗好多嘅言，但都得唔到佢回覆。甚至第二日去到佢屋企樓下，我呆企咗喺到八個鐘，都見唔到佢嘅身影。後來阿星靜靜雞話我知，阿南去咗佢媽媽屋企暫住，仲話阿柔千叮萬囑佢唔可以話我知。

原本我哋可以過一個好開心嘅聖誕節，甚至係一齊倒數，一齊邁向新嘅一年。

除夕夜，佢哋個個都有街去，只係淨低我一個孤零零咁喺屋企。





「十、九、八...」電視傳出倒數嘅聲，但我都冇心情再去睇。

冇咗阿南，同冇明日有咩分別？「新年快樂。」
我喺Whatsapp打咗呢句說話俾阿南，由一個剔、到雙剔、上線、Bluetick、之後下線。經過一絲絲嘅期待，但都得唔到佢嘅回覆。

去到後來，我甚至開始質疑，既然佢咁了解我，點解唔肯相信我嘅清白？我曾經想搵阿月去幫我解釋，但阿月同阿南一樣，好似喺我嘅世界入面人間蒸發咗，點搵都搵唔倒。

然後終於等到開學嘅日子，我滿心期待，一早就返到學校等阿南返嚟。

一返到學校，大家嘅目光好似都放咗喺我身上咁，令我好唔自在。原來成名嘅感覺都唔係咁好，尤其當你係因為一啲醜聞而出名。





而始作俑者符文安。更加喺我面前趾高氣揚咁行過。

「咦，情聖，返嚟啦？你...啲女朋友呢？」佢好囂張咁問。我真係冇試過咁想打一個人，如果殺人係合法嘅話，或者佢而家已經俾我分屍。「你知唔知呢，你個廢柴樣真係好乞我憎。你同你班Friend都只係一班垃圾，尤其是果個咩洛賓，仲想同我爭子晴？吔屎啦！你啲咁嘅垃圾憑咩食曬阿南同阿月？」或者喺佢眼中，女仔只係一堆俾佢消遣嘅玩具。所以當佢出言侮辱阿南同阿月，我再控制唔住我嘅怒火，向住佢塊臉打咗一拳。

「你含撚啦仆街，你啲二世祖先係垃圾！除咗錢之外你乜撚嘢都唔係啊！」估唔到，佢一拳就俾我打到瞓咗喺到。一下突如其來嘅一拳，令我都唔知自己到底出咗幾多力。但見識到佢嘅脆弱，我好似失去理智咁不斷向住佢個身好用力咁踢。

「你估個個都係你嘅玩具啊？」一下。

「你估我哋就只可以俾你糟質咩？」兩下。





「人哋怕你，我當你Kai子咋。」三下。我將呢個禮拜所有不快嘅情緒發泄曬喺佢身上。

見到主人俾人打，佢班跟班即刻撲出嚟拉開我。符文安見到我受制，即刻企起身並且向我暴打以報復。「安！安！安！打死人啦！」直至聽到阿月嘅叫聲，先將我從憤怒之中拉返出嚟，佢不斷用力將我身邊嘅跟班推開，唔係真係會俾個仆街打死。

「你個仆街...咳...咳...等停學啦。」符文安口中含住鮮血，而且掩住俾我重撃嘅位講。

本來，聚集咗好多食花生嘅同學，當佢哋陸續散去之後，我先見到阿南嘅身影，佢個樣變得好樵椊，並且眼神中有一種我從來冇見過嘅冷漠同生疏感。見到佢咁嘅樣，令我個心好似仲痛過俾符文安打。而喺我發現佢之後，佢亦隨即調頭離開。

我為你同阿月出頭，但你就一句都唔安慰一下我？

「你係咪傻咗啊？你會俾人踢出校㗎！」阿月講。

「你去咗邊啊？點解你唔聽我電話？」我問。





「我...」佢欲言又止。