《想溝到女千祈唔好學我咁》: 10.8

「哼，我話你聽啦有錢佬，其實你自己都好怕。」冷靜落嚟之後，我慢慢再諗返成個過程。

「我怕咩？」被挑釁到嘅中坑，托一托眼鏡咁問。

「你其實都知自己個仔闖咗大禍，將堂堂邵家大小姐嘅照片放上網俾人睇，肯定嬲到邵家震曬。而你哋兩家一直都需要對方喺商場上嘅勢力，而家你個仔得罪咗人，你估人哋會點諗啊啦？」

「荒謬，我符家洗睇人面色？」中坑終於望一望我，證明我講嘅嘢唔中曬，都啱咗一半。

「你唔好話，佢自己撻親啊。」我行去符文安身邊，拉開佢嘅手袖，一條條被鞭打嘅瘀痕果然喺手臂上出現。





我一直都覺得奇怪，點解一個咁牛高馬大嘅運動健將，會咁不堪一擊？除非本身佢已經受咗傷。

「關你鬼事啊，你個垃圾，邊輪到你管我屋企嘅事？」

「安！收聲！」中坑怒喝符文安。「係啊，我係垃圾。但至少我老豆當我係人咁育我養我。你？你老豆當你係隻狗，適當嘅時候攞你出去同其他名種交配咋！」我對住符文安講，睇住佢敢怒不敢言嘅樣，實在心涼。

「校長！如果你唔將呢個男仔踢出校，我今日絕對唔會算數。」俾我揭開真面目嘅中坑，惱羞成怒咁講。

「但…但係，今次又真係貴公子都有部分嘅錯，萬一咁樣傳咗出去，對學校嘅聲譽都…」





「傳媒方面有咩問題？我會冚住。」

「咁...」校長喺到沉思。

就係咁，我被罰一個大過、停學兩個星期，兼要寫一封悔過書。其他嘢會喺兩個星期後再做結論。今次俾我睇清楚一件事，所謂有錢人，都只係企喺金錢上嘅小丑，錢以外，就係面子最緊要。一旦撕破臉，只係一個醜陋、腐朽嘅人。「兩個禮拜後見喇。」放學果陣，我同幾個兄弟講。

「得啦，我哋會嚟探你。」

「你哋留番啲時間嚟陪女啦。」喺聖誕節表白成功嘅佢哋，正正身處最快樂嘅階段，無謂俾我嘅事影響倒佢哋。





當我返到屋企樓下，終於俾我見到呢個身影，一個我朝思暮想嘅身影。

「點解要打交？」但果一個以前好甜美嘅笑容，冇跟住佢出現，阿南臉上掛住嘅，仍然係今朝果個冰冷嘅表情。

「件事已經完咗，唔答得唔得？」我問。

「點解要打交？」佢仍然追問。

「佢侮辱你。」我答。

「你唔識諗吓後果㗎咩？萬一佢要玩死你咁點算？」佢問。
​​​​​​​「我冇所謂。」

「咩冇所謂？你一直都唔會咁唔理智㗎。」





「喂得啦！我搵你嘅時候你又唔理我，我比人打嘅時候你就袖手旁觀，阿月至少都會出嚟趕走啲跟班，你呢？而家扮咩關心我姐？」

有啲說話，衝口而出講咗，就收唔返。

我再因為衝動，將我呢排鬱鬱埋埋嘅煩燥，發泄咗喺佢身上。

當講完果一剎那，我已經好後悔好後悔，但太遲。

「對唔住，或者係啦。阻咗你咁多時間，唔好意思。」佢眼睛再次變得濕潤，就好似果日喺巴士到咁，然後轉身就走。

「唔係！唔係㗎！我唔係咁嘅意思！對唔住！對唔住！」我即刻衝上前攬住佢，但佢一直掙扎，企圖甩開我嘅糾纏。

「走開啊！你去搵阿月喇咁！」終於，佢都係甩開咗我，我諗我呢句說話，真係令佢受到好大傷害。佢嚟搵我，唔係代表佢會關心我咩？我好聲好氣咁同佢講嘢，咁咪可以和好囉。咁衝動做咩啊，李卓正！