《想溝到女千祈唔好學我咁》: 10.5
喂！壞人！你好嗎！
條頸巾啱唔啱戴呢？不過唔啱戴都要戴住㗎啦！織咗我好多晚啊！
如無意外嘅話，我諗你而家應該好滿足咁睇緊呢封信呢？因為我哋應該一齊渡過咗個好美好嘅一日。
講個秘密你知，其實啊，我由細到大都未試過俾人冷落㗎！我去都邊，都會識到好多新朋友。但你啊！你係第一個，會對我唔瞅唔睬。果陣我好大打撃啊！所以我由中一開始已經好留意你喇，我好想知點解我呢個人見人愛嘅形象喺你面前會失靈。雖然之後冇同班，但你嘅一舉一動都盡收喺我眼底之下。
你應該係我見過最特別嘅人，無時無刻都會拎住本書，除咗讀書之外咩都唔識，就算體育堂都淨係坐埋一邊睇書。除咗同果三個老死有交流之外就同其他人幾乎零接觸，尤其是係同異性。有一次見你同個女仔傾偈果個想捐落地底個樣真係而家諗返起都好好笑！不過後來先知，係你家庭背景先會令到你咁。哈哈，原來我哋都係單親家庭長大，我哋仲唔係天造地設嘅一對？
後來你肯同我講多啲嘢，我真係好開心啊！即使係一啲冷言冷語，我都覺得足夠。因為每次你嘅冷漠當中，都係包含住少少嘅熱情、少少嘅關心。即使你每次都表現到好唔願意，但最後我要求你嘅嘢你全部都會做得到。
你會幫助我去搵手球隊嘅成員，去氹班小朋友開心，甚至...去睇我比賽。我知你其實係想幫我嘅！你認唔認啊？我知你一定唔認，問親你任何嘢你都唔認啊！肯定係反叛期！
不過，話你聽啊，果日輸咗波都咁開心，唔係因為打得好定唔好，係因為有你嚟睇啊！原來見到你出現，會俾倒我好多信心。我知其實你只係一座缺乏溫暖嘅冰山，所以我決定，一定要盡我能力，俾好多嘅溫暖你！因為不經不覺間，我諗我都鍾意咗你喇。
但之後你都知喇，幫助你，反而令自己喺同你之間建立咗一道牆，好彩你願意為我打破呢道隔膜，識你咁耐最勇敢係呢次喇！好多謝你喺我外婆走咗嘅日子一直陪住我，你話過會一直陪住我，你唔係呃我㗎可？
以你嘅性格，我估等你開口嘅話，我隨時等到人老珠黃都未等到，所以我而家喺到問你，李卓正！你願唔願意做我男朋友啊？
我俾兩個選擇你！一個係做！一個就係撕咗封信然後即刻跳樓自殺！希望聽日唔會喺港聞版見到你喇！
南