《想溝到女千祈唔好學我咁》: 10.4

「唔係啊，我鍾意溜冰啊、又食咗間好好食嘅餐廳，雖然係睇唔成戲，但睇咗戲就冇得同班小朋友玩啦！」

「唔係咁，我唔知你鍾意溜冰，係阿星話可以借啲意捉住你隻手。去貓Cafe，係阿雄話女仔一定鍾意寵物。去睇戲，係洛賓…」

「傻阿正，點解你會曬三個同你一樣冇戀愛經驗嘅人㗎。」佢笑我。

「係囉，原來信錯咗。」

「做多啲自己啦，唔好為咗取悅我而逼自己做咁多難受嘅嘢。」我曾經聽過唔少人吐苦水，話要為咗個女仔準備呢樣準備嗰樣，為嘅只係氹個女仔開心。今日聽到阿南講嘅嘢，我先知只係嗰班人唔好彩先要咁做。





遇上阿南，或者係我最幸運嘅事。

「啊係啦，送俾你喇，聖誕節禮物。」我喺袋入面拎出CD同信，送俾阿南。

「咩嚟㗎？」佢問。

「你…返去聽吓就知喇。」我答。

「嗯…我都寫咗封信俾你，你都係返去先睇啊！」佢答。





「我想而家睇喎。」我答。

「唔得啊！要返去先！」

「好啦。」

喺呢個咁甜蜜嘅時刻，我本來應該好好享受一下二人世界嘅甜蜜。但我選擇咗好似平時咁拎咗部電話出嚟Facebook，亦因為咁，而俾阿南見到一啲，唔應該見到嘅嘢。

「呢個…」





「唔…唔係咁！你聽我講！」符文安條契弟，喺Facebook放咗一張，阿月喺涼亭錫我嘅相。好可能，果一晚佢一直匿埋喺暗角偷偷哋留意住我哋，先捕捉到呢個時刻。

「佢突然錫埋嚟咋！我完全反應唔切！」我情急之下，有啲大聲咁講。

「咁點解佢會咁…」

「佢…」如果我答因為我聽完佢分享心事所以佢先回禮，呢個答案會唔會太滑稽？

「我都唔知。」我頭都耷曬咁講。

「咁我諗你要搞返清楚件事先啦。」佢突然變得淚眼汪汪咁講。

「好清楚㗎！我唔鍾意佢！因為我…」

「我講過㗎，一段關係入面唔可以有第三個人喺到，即使係咩形式，你搞清楚之後再搵我喇！」之後佢就落咗車，淨低我一個人…同埋一炸我哋送俾對方嘅禮物。





點解會咁？頭先唔係仲好哋哋㗎咩？點解我要咁手痕打開Facebook？

唔係。

點解我唔識得同阿月，保持返距離？返到屋企，老豆見我垂頭喪氣嘅樣，估我九成失敗咗，所以就安慰我：「可能要啲時間姐，冇問題嘅。」

「唉，唔係，好複雜。」我答，之後我就入咗房。

我將條頸巾除咗落嚟，將佢放好喺衣櫃。望住一針一線都好完美嘅編織，唔知佢用咗幾多時間先織得好呢條頸巾？

點解佢會知我冇頸巾？點解佢會知我鍾意炭灰色？

但我就從來冇細心咁留意過佢嘅嘢，就連佢對貓敏感都唔知。





我打開咗佢寫俾我嘅信，信入面出現好秀麗而且熟悉嘅字跡，啲字跡成日出現喺佢借俾我嘅筆記上面，估唔到而家會出現喺一封親筆寫俾我嘅信中。