《想溝到女千祈唔好學我咁》: 10.3

「今朝睇仲有好多飛，我以為Walk-in買都得...」我答，今日嘅種種不順，令我心情直插落谷底。我而家先發現自己完全唔係一個周到嘅人，先會令每個自己想做到嘅嘢都以失敗告終。

最歸根究底嘅係，原來我對阿南嘅了解都唔係好深。

「唔緊要！我反而有個地方想去！」佢講。

「嗯？邊到？」

「南姐姐！正哥哥！」冇錯，我哋又返咗嚟孤兒院。





「點解你哋會嚟嘅？」若儀見到我哋之後問。

「你哋有聖誕Party喎！預唔預我哋先！」阿南問返佢哋轉頭。之所以會返嚟呢到，係佢想喺呢個咁普天同慶嘅日子，令一班小朋友感受到更多嘅愛。

「歡迎啊！」之後若儀就拉住我哋，跑入已經佈置得好有聖誕氣氛嘅小禮堂。一班小朋友見到我哋，都好雀躍咁將我哋圍住咗。

「喂你又高咗喎。」我對住聰聰講。「龍Sir教我打籃球啊嘛。」佢答。

「係啊，男仔打籃球易長高同大隻啲。」龍Sir從後攬住聰聰答。





「好啦，你哋快啲帶我去玩啦，我等唔切啦！」阿南講。然後班小朋友就帶咗佢同其他姑娘圍咗個圈，玩唔同嘅小遊戲。

見到阿南同小朋友都可以好開心，可能嚟呢到都真係一個正確嘅選擇。我唔知我哋唔出現，班小朋友會唔會都可以好快樂咁慶祝，但肯定嘅係，阿南嘅出現一定可以帶俾佢哋更多難忘嘅時刻。

因為佢就係一個咁有正能量嘅女仔，隨時隨地都可以令身邊嘅人開心嘅人。

「好彩有你哋，唔係我哋要湊咁多小朋友都好辛苦。」龍Sir講。

「我哋都冇特別嘢做，所以咪嚟同佢哋玩。」





「點啊，你捉實你眼前人未？聖誕都一齊過，得米啦？」佢問我。「捉緊，但未捉得實。」

「你哋都係善良嘅人，一定會有好結局。」

「龍Sir你呢？聖誕節唔洗陪女朋友？」

「呢到有活動，邊行得開？一陣啦，佢都會嚟。」

「真係好奇你點解仲可以有私生活。」我講。

「其實冇乜㗎，不過睇住班小朋友一日一日健康咁成長，都值得嘅。有時再教佢哋有一技旁身，希望可以令佢哋搵到發展嘅興趣啦。」龍Sir向我展述佢嘅抱負。其實龍Sir俾佢哋嘅，豈止呢一啲嘢？隨住嚟嘅次數越多，我越佩服佢對呢一班小朋友咁義無反顧嘅付出，佢就好似呢班小朋友嘅爸爸，令佢哋喺破碎嘅背景下都唔會自卑。

講講吓，龍Sir嘅女朋友都出現，佢出現嘅時候，令到我同阿南都大吃一驚。

「Miss Lam？！點解你喺到？」我問。「應該我問你哋啊？」Miss Lam著得好樸素，同平時喺學校嘅打扮好唔同。





「佢哋嚟同班小朋友玩。」龍Sir同Miss Lam講。

「原來你哋…好浪漫啊！」阿南好雀躍咁講。

Miss Lam今年開始負責生命教育科嘅探訪活動，所以咁同龍Sir結識咗。並且之後多次嘅聯絡同接觸令佢哋更了解對方，所以就撻著咗。

兩個都係培育下一代嘅人，亦都男才女貌，我都覺得佢哋好匹配。

有咗Miss Lam嘅加入，大家玩樂嘅氣氛更加濃烈，搞到一班小朋友都唔捨得結束個派對。

「今日玩得好開心啊！！」喺我哋走咗之後，我送阿南返屋企嘅時候阿南喺車上面講。

「真係咩，除咗去孤兒院之外，所有嘢都唔喺我控制之中。」