《想溝到女千祈唔好學我咁》: 9.4

「喔...所以無論阿星、符文安定我哋學校，都係你想開始新生活嘅跳板。估唔到我呢啲平凡人都會接觸倒你哋呢啲豪門恩怨。」佢好天真咁答。

其實啊，轉校之後最大嘅得著，就係識倒呢個白痴。雖然佢好戇居，又好鈍，但佢對人好真誠。完全唔似我以前見過果啲虛假嘅上流一族。

我哋會一齊睇好多書，我係為裝備到自己好有知識，但佢係真心鍾意閱讀。我好享受每一個同佢喺圖書館睇書嘅時刻，好鍾意同佢討論唔同書嘅結局。

佢好為朋友，會為咗兄弟做好多好傻嘅事，甚至竟然相信我會破壞阿柔同阿星而阻止我。

佢好為阿南，知道阿南有咩事，會即刻仆過去，但願意做咁多嘢，都唔敢講一句鍾意人。每次見佢同阿南之間嘅追追逐逐，真係睇到我好莫名奇妙，點解呢個傻仔仲未get倒阿南嘅心意？但同時，我有啲害怕，害怕佢哋會越拉越近。上次見佢好努力咁練歌，為咗送一份禮物俾阿南，真係睇到我好感動。我好羨慕阿南，有個咁真心真意對佢嘅人。我甚至有啲羨慕...果個係李卓正。





頭先喺禮堂同佢跳舞，我好想同佢講，其實我鍾意佢，但始終都講唔出口，我知道會破壞佢同阿南，我唔想做呢個角色。其實我自己，同佢一樣咁細膽。

不過阿南今日唔喺到，有少少甜頭都唔過份掛？


「阿月視角」完～ 聽完阿月嘅故事，估唔到佢嘅背景係咁複雜。我從來冇諗過，一啲電視劇先會出現嘅爾虞我詐，賣女求榮嘅情節，喺現實都會上映，或者平凡真係會限制視野。我一直覺得佢好叻、好成熟，但原來全部都係長期喺一個咁高壓嘅環境下，佢先被逼裝備好自己。事實上，佢都有好多大懵、發傻嘅時刻。淨係睇今日嘅衣著就知道。其實佢都會有脆弱、傷心嘅情緒，不過好似從來冇人會顧過佢嘅感受，無論係佢屋企人，定我哋。

原來平凡都有平凡嘅好，至少我哋更容易得到愛。

「多謝你啦今日。」佢對住我講。





「多謝咩？」「我知你唔想陪我嘅，唔係阿南唔喺到嘅話。但你都好盡責咁陪咗我成晚。」

「咁又唔係...都係嘅...」為咗唔想佢受傷害，我本能地否認咗，但後來覺得，我唔想佢身邊又多一個對佢呃呃騙騙嘅人。

「多謝你咁誠實。」

「我終於明白你之前講『就算你得到一啲嘢，都唔代表可以擁有佢』係咩意思。勇敢啲追求你想要嘅生活啦，你控制唔倒過去，至少可以把握將來。」

「哈，真係得咩？」佢問。





「我都唔知，但每個人都會有改變嘅機會，只係睇契機。」我答。

「原來你都識安慰人。」

「睇下你受唔受啦。」「啜。」喺猝不及防嘅瞬間，佢「偷襲」我臉頰一下。而且更俾佢對巨乳壓咗落我手臂，由於速度太快，你可以當俾個飛過嚟嘅籃球撞咗落我隻手，啊唔係，係兩個。

「受啦緊係。」佢之後講。

即使佢已經唔敢抬起頭，但喺明月照映之下，仍然見到佢塊面紅到好似發燒咁。一直以嚟，佢都好似一個魅惑眾生嘅小惡魔，成熟、高傲而且神秘。今晚係第一次，睇到佢咁柔情嘅一面。原來佢都會怕醜，都會面紅。

只不過，第一次俾女仔錫嘅我，大腦已經完全Hand曬機，無多餘大腦能量再咁仔細咁留意佢嘅反應。

喺我腦海只有殘留一種感覺，就係佢嘅嘴唇原來好軟。





「喂，你咩事？」冷靜落嚟之後，我先問。

「答...答謝囉。」佢答。

「都有好多其他方法姐。」

「呢個直接啲啊嘛。」有錢人嘅心思真係完全猜唔透。

「好彩你遇著嘅我，唔係你已經俾人溶咗。」我答。

「我知你唔會嘅。」佢拍一拍我個頭，不到兩分鐘嘅時間，佢已經變到若無其事，頭先嘅事好似冇發生過咁。