《想溝到女千祈唔好學我咁》: 9.3

「死喇，原來我哋已經用曬啲錢。」Wilson同我講。

「咁點算，我哋咪冇得再周圍玩？」我問。

「唯有周圍行下囉。」

我哋喺旺角嘅街頭行嚟行去，當中有好多人喺條街到唱歌，好熱鬧。但可能人太多嘅關係，Wilson怕我走失，所以一直拖住我行。突然間，我覺得我哋好似一對小情侶，而我亦真係俾佢嘅樣貌同風度吸引倒。

行到咁上下，我哋都各自搵返我哋嘅司機接返我哋。其實我知道，我哋根本唔係窮人，就算點扮都唔會改變倒呢個事實。即使我哋用曬啲錢，一個電話都可以解決所有困難。





但就算係咁，印象中嘅呢一日，係我過得最難忘、最開心嘅一日。

呢日之後，我同佢嘅接觸亦多咗好多，佢會周不時約我周圍去，去嘅都係合乎返我地身份嘅地方。隨住接觸越多，大家都對對方有意思，所以就喺一個晚會，一個聯校嘅聖誕晚會，佢喺好多人跳舞嘅舞池中，錫咗我一啖。「咁...係咪即係拍拖啊？」我問。

「睇吓你想唔想囉。」佢答。

「想...」

可以同佢一齊，真係我得到最好嘅聖誕禮物。因為佢對我真係好體貼，會諗好多小驚喜氹我開心，有時放學會特登接埋我，同我去唔同嘅地方玩。佢亦會帶埋我去佢朋友嘅聚會，當時嘅我仲因為呢種受到肯定嘅感覺而興奮咗好耐。





但原來，全部都係一個局，一個我爸爸策劃出嚟嘅局。

當有一日返到屋企，屋企突然多咗一個西裝筆挺嘅男人，一睇就知佢同我爸爸係相同份量嘅人，我指喺財產方面。而且呢個男人，輪廓有幾分熟悉，好似喺邊到見過咁。

「咦，阿月，返嚟啦，叫符Uncle啦。」一入到門口，爸爸就要我打招呼。

「符...Uncle？」連姓都咁熟悉？「係啦，Wilson冇同你一齊咩？」爸爸問，係喎，Wilson都係姓符。

我擰擰頭，然後借故離開，再暗中偷聽佢哋嘅對話。從佢哋嘅對話當中，已經摸到一啲端倪，Wilson同我嘅相識，唔係意外、唔係緣份，係計劃。一個符家同邵家聯謀嘅計劃。





「What…！佢地安排你男友溝咗你，然後嚟一個自然啲嘅商業婚姻？」我未講完，阿正已經估到故事嘅走向。佢講得啱，我後來先發現，Wilson都係佢哋安插喺我身邊嘅人，即使佢之後點解釋、又話點樣真係鍾意咗我，但我都冇辦法原諒佢。

由此之後，我更決心脫離屋企人嘅控制，但當然冇咁傻，一嚟就同佢哋反面，但我學識點樣透過取悅佢哋去換取自己嘅利益。同樣覺得，唔需要對任何人付出真嘅感情，因為大家喺最後都只係會顧自己。

但幾時先可以脫離倒？我都冇答案。

「吓？咁你點識阿星？」阿正問我。「咪話咗我陪個朋友去睇波囉，咁啱果場就係對你哋學校。」

「你為咗阿星轉校同你脫離本來生活有咩關係？」

「我已經好厭倦喺本來嘅圈子生存，實在太多是非。要過一啲新生活，就要搵個理由轉校。」

「咁所以你話鍾意阿星咪都係貪玩？」

「我真係有一瞬間俾佢嘅球技吸引倒，但好快就知係一啲錯嘅情感投射。況且，我一早知我唔會夠阿柔爭啦，我嘅出現先係逼佢哋認清自己嘅感情啊。」





「咪住先，你阿爸又會俾你轉校？」哈，佢原來係個問題少年。

「當初我同我爸爸講要轉校，佢當然反對，但當我話可以同符家再接近多啲，佢就即刻應承。」我爸爸，真係徹徹底底咁當我係斂財工具。

「符家...符文安？Wilson係符文安？！」

「你覺得佢似又謙遜又靜咩？佢係孖生細佬。」當我同Wilson分手之後，聽講冇幾耐佢就去咗外國讀書。其實我相信佢所嘅一切都係被逼，只係我冇辦法說服自己成為商業下嘅棋子。

但二仔符文安就係典型二世祖，特登唔入名校周圍食女。