《想溝到女千祈唔好學我咁》: 10.1

最好真係冇發生過咁，咁阿南就唔會知。可能係出於自私，所以唔想喺表白之前有咩變卦。雖然唔係我做主動，但感覺上都好似有啲背叛咗阿南。

不過唔理得咁多喇，因為第二日就係，聖誕節！

一朝早起身，我就為自己做少少打扮。

「老豆，有冇啲Smart Casual啲嘅衫借俾我？」然後先發現，原來我連一件得體小小嘅衫都冇。

「衣櫃。」相反，老豆成日要出席唔同嘅場合，所以有好多唔同種類嘅衫。





好快，我就揀好一套，得體得嚟又唔會太正式嘅衫。

「有約？」臨出門口之前佢問。

「嗯，約咗阿南。」最緊要係隻CD，同埋一封，我寫俾佢嘅信。對於不擅辭令嘅我嚟講，都係文字先可以將我所有感覺表達出嚟。

「祝你成功。」老豆一邊睇住報紙，好淡然咁同我講。原來佢都估到，我會喺今日表白。有老豆開嘅綠燈，令我嘅信心都大好多。冇耐，我就去到阿南屋企樓下，等待佢嘅出現。只係短短幾分鐘，我已經來回踱步咗唔知幾多次。我終於明白心急如焚嘅意思，原來等待，真係會好似被火燒一樣咁煎熬。

終於，喺大廈嘅玻璃門入面，佢嘅身影慢慢出現，越嚟越近，越嚟越清楚。喺佢出嚟嘅一瞬間，佢不斷輕咬住下唇，眼神不斷喺我同地下之間徘徊，可愛到極點。





我突然好感嘆造物主嘅偉大，所以先俾我遇上一個美若天仙得嚟又心地善良嘅女仔。

「嗤！咩事啊！」佢行到嚟嘅時候，我哋都忍唔住相視而笑。因為我哋同樣地著咗件以紅色為主嘅衫，拍埋一齊就好似兩個流動利是封咁。

「你化咗妝喎。」我發現佢腮邊嘅緋紅，佢應該輕輕咁化咗層淡妝。

「你都Gel咗頭喎。」佢答。

「去邊啊？」佢之後問。其實佢唔知今日嘅行程，佢話想我決定。我諗到頭都大都唔知去做啲咩好，於是就問過班兄弟嘅意見。「去溜冰先啊！溜冰場又近你屋企。」我答。呢個係阿星嘅提議，佢話係一個可以好合理地同女仔拉近距離嘅活動，可以一邊教佢，一邊捉住佢隻手慢慢溜。





「好啊！」佢聽到之後好興奮。

「行咯咁。」我再講。

「等陣！戴埋呢條嘢就襯曬你喇！」佢喺手袋入面抽出一條炭灰色嘅頸巾，然後幫我戴上。

「你自己織？」我問。

「廢話！都織得幾好啊可？」

「一百分！多謝你！」我答，啲人成日話手織嘅嘢係溫暖牌，果然冇錯！戴咗呢條頸巾之後，個身真係暖好多，個心都係。

喺行去溜冰場嘅過程，我哋不斷有唔同嘅話題傾，一啲約會嘅尷尬感覺都冇。或者呢份可以令我敞開心扉嘅自然，係我最鍾意同佢一齊嘅原因。其間，佢都有問到尋晚晚會嘅事，令我不自覺都回想返起阿月錫我果一幕，不過我始終都冇對阿南將呢件事講出口。