《想溝到女千祈唔好學我咁》: 8.7

「嘩…呢Take可以喇，就係咁喇。」喺我唱完之後，阿杰同阿柔唔知幾時都返咗嚟。

「可惜啊，冇錄到，唔知仲唱唔唱得返？」阿柔好可惜咁講。

「我靜靜雞咁㩒咗錄音喇，錄曬喇。」呢下又真係估阿月唔到。

「咁多制你都識㩒？勁喎。」阿杰對佢講。

「輕鬆啦，阿姐都成日錄Cover，呢個Software用到熟曬。」到底佢仲有幾多嘢係我哋唔知…





「喇，你唔成功唔好返嚟見我哋啊！」阿柔將燒好嘅光碟交到我手，我望住呢隻碟，感覺好唔實在，唔敢相信真係出自我呢個音樂白痴身上。

話咁快，就到咗聖誕Party嘅日子。我哋學校少數可取嘅地方，就係聖誕聯歡會會直落成日咁滯。上晝都係同大家記憶中嘅一樣，早會完就上返課室玩，去到一點左右就會放學。

然後同學可以選擇參加埋夜晚由學生會搞嘅晚會，對當時冇得出太多夜街嘅學生哥嚟講，都係一個幾好嘅慶祝活動。但過往我對呢啲慶祝活動都冇太大興趣，淨係想快啲完咗上晝嘅活動然後就返屋企。

所以我其實都唔知有咩好玩，果陣話好玩都係氹住阿月先。

但今年阿星要參加，阿雄都話要參加，傻嘅都估到原因，咁我同洛賓唯有捨命陪君子，況且都最後一年，都想留低一啲回憶。





雖然冇阿南喺到，我都唔知有咩回憶值得留低。

「你著到咁求其㗎。」果一日，我哋係可以著便服返去。望住著住Hoodie加牛仔褲嘅我，阿南一臉嫌棄咁講。而阿南就著咗一條深黃色嘅不織布質長裙，再配上一條黑色Legging加一條灰色冷頸巾，一個鄰家女孩嘅形象簡單呈現咗出嚟，同佢平時咁運動型嘅裝扮好唔同。

「你早啲通知我你會著咁靚我就執好睇啲。」

「越嚟越口花啊你！」佢用手指篤我個太陽穴，但臉上仍然洋溢快樂嘅笑容。

「喂，試下。」佢遞咗一個保溫盒俾我。





我打開個盒，一陣濃郁嘅蒜香味湧入我嘅鼻哥霳，係一兜蒜香蝦意粉。我食咗一啖，意粉軟硬有致，伴隨住一啲蒜蓉粒令咬落嘅意粉更有口感，仲有好鮮甜嘅蝦油令味道更昇華。

「好好食喎，你整嘅？」我問。

「廢話。都話我煮得兩手，你又唔信。」

「信喇而家。」呢一碟應該係我食過最好食嘅意粉。

「好食咪...再煮俾你食。」「咩話？」我掛住食，聽唔清楚佢想講咩。

「冇嘢啊！傻佬小心啃親。」

「唉喲，點解你有意粉食我哋冇㗎？」阿星唔知喺邊到彈出嚟，搞到仍然沉醉喺曖昧氣氛嘅我同阿南突然變得尷尬。

「你要啊？去隔離班睇下阿柔有冇煮俾你？」洛賓取笑阿星。





「以我所知冇啦，哈哈。」阿南講。

「獨食難肥喎正哥，分啲嚟啦！」阿雄講。

「你肚餓咩？我食唔曬俾你食啦。」嘉慧突然拎咗一盒Cupcake出嚟，遞俾阿雄。

係一個有包裝過嘅食物盒，想像唔倒嘉慧會做啲咁少女心嘅嘢。「你都冇食過扮咩食唔曬啊？你特登整俾阿雄嘅！」洛賓好唔識趣咁篤爆嘉慧。

「Woooo~」我哋起哄。

「關你鬼事咩！唔食我一陣掟咗去啦！」嘉慧扮曬鎮定咁講，但佢果塊紅過紅蘋果嘅臉已經出賣咗佢。

「唔…唔好！多…多謝曬。」第一次收女仔禮物嘅阿雄都呆曬咁唔識俾反應。





「唉，我哋走啦～走啦，再留喺到冇太陽都會曬死啦。」阿星慫恿洛賓。

「好喇，返埋位先！我哋嘅聖誕Party正式開始！」Miss Lam一入到嚟班房，就好有朝氣咁講。

「嗚呼！！」我哋成班都好雀躍，難得考完試終於可以好放肆咁玩。