《想溝到女千祈唔好學我咁》: 8.8

「喇，我應承過大家邊個考到頭三名會有份大禮送俾你哋，而家係我兌現承諾嘅時候喇！」Miss Lam一邊拎出包紥好嘅禮物，一邊講。果刻我哋其實都未收到成績表，所以大家都好期待三甲會係花落誰家。

「第三名係！登登登！陳昭勁！」班上嘅邊緣人，冇乜兩句。

「第二名！老師真係好感動，波又打得咁好，成績又咁好，恭喜曬洛賓同學！」

「吓！！」我哋全部人都好驚訝，只有佢好驕傲咁從人群中走出嚟。喺我哋記憶中，佢嘅成績一向都係中規中矩，估唔到會突然進步得咁多。

「我平時收收埋埋咋！」佢即刻變得好牙刷刷。喺佢接過禮物之後，見到佢同子晴對上一眼，仲向住佢好滿足咁舉起手指公，笑得好燦爛。望住佢哋嘅我，突然有一種心疼嘅感覺。





「好喇第一名，你哋都估到會係邊個啦！就係阿月喇！」Miss Lam都唔再整色整水，大家都估到會係阿月嘅囊中物。我哋都為睇唔到奇蹟出現而發出一陣陣嘅噓聲，阿月接過禮物之後都對我哋扮鬼臉。呢個可愛嘅舉動即刻令班男仔差啲再次暴動。

「你睇你，頭三都冇。」阿南Whatsapp窒我。

「車，你夠冇。」我反擊。

「你囉，阻住曬我溫書時間。」

「唔知邊個睇得YouTube多？」





「好喇，以下嘅時間就交俾男女班長！」Miss Lam退場，換上我同阿南接手主持。

「男、女班長！」等到Miss Lam叫咗我哋幾次，我哋先喺Whatsapp中抽離而回到現實。

「唔好自私傾先得㗎嘛！」Miss Lam都笑我哋。

「Wooo~~~」聽到呢啲咁具刺激性嘅說話，大家又再度起哄，尤其係阿星幾隻嘢。「係…係啦，咁冇禮物嘅大家都唔洗灰心，我哋仲有交換禮物環節，所以禮物係人人有份啊！」阿南揸住支咪講。

「咁大家嘅禮物都已經分曬編號放咗喺檯出面，每人喺抽獎箱抽到咩號碼，果份禮物就係你㗎喇！」





交換禮物，堪稱世上最令人崩潰嘅環節，大家一年內所有嘅腦細胞就係用嚟諗點樣可以喺呢到將抽到禮物嘅人玩弄得體無完膚。

而我同阿南好精明咁利用職權，可以從呢個環節中置身事外。果然，大家都各出奇謀，一時間，呢個地球上最無用嘅嘢都交到曬各位同學手上。

「邊個送㗎呢個！」阿星攞住一大袋洋蔥，流曬眼淚咁問。

「你都好啊，可以食咗去。我真係唔知點拎呢個返屋企。」阿雄講。唔知邊個同學有咁嘅本事，抬咗一個地盤用嘅水馬上嚟，阿雄抽倒嘅時候，仲呆過收到嘉慧整嘅蛋糕。「嘩，好彩我哋真係冇玩姐。」我細細聲咁同阿南講。

雖然大家表面詐曬型，但我知道呢個會係大家一個好美好嘅回憶，人生可以瘋狂任性嘅時候唔係好多，能夠毫無責任地去整蠱一個人，已經不枉自己滿腦子壞主意嘅青春。

之後落嚟，我哋玩咗一啲遊戲，懲罰咗一啲輸家，食咗一啲嘢，就已經去到完結嘅時間。

「好喇大家，下年見！」Miss Lam放學之前講。

「你考第幾啊？」攞咗成績表之後，阿南問我。





「第六。」

「嘻嘻，我第四！你輸咗！請食雪糕！」

「咁都得啊？」

「係啊，咁你請唔請？」

「請啦請啦。」

今日成間學校都充斥住好濃厚嘅聖誕氣氛，喺我哋買完雪糕返課室嘅路程，大家都跑嚟跑去搵唔同嘅人影相。