《想溝到女千祈唔好學我咁》: 8.6

「嗯？！我陪你啊！等佢一個人冷靜下都好。」阿柔講。就係咁，成個Studio就得返我自己一個。

難得冇人，我終於可以試下放膽去唱，始終喺佢哋面前，總係有啲怯。

唱唱吓，我仲忘我到合埋眼咁唱。

唱完一小段，正當自我感覺良好之際，門口竟然出現一個意想不到嘅人。

「嘩，你點會喺到？」佢突然嘅出現，令我不禁嚇一跳。





「呵，我一陣約咗阿柔行街，佢叫我上嚟等住先。」再次著住小背心加短褲嘅佢，真係每次出街都覺得好誘惑。冇錯，嚟嘅人正是阿月。

「嘛，幾夠薑喎，竟然挑戰唱歌，難聽嚟講都算唱得幾好啊。」「關…關你鬼事。」俾佢見識到我嘅醜態，真係想搵窿捐。

「不過爭咁啲啦。」

「你又識？」

「阿姐聽歌果陣你仲係唱緊ABC。」





「咁爭咩啊？」

「唱歌最緊要嘅係感情。你啲感情爭咁啲囉，唱到讀書咁。」

「咁點先有感情呢，邵小姐？」

「你唱俾阿南㗎嘛，當你諗住同佢嘅回憶嚟唱，自然會有感情。」

「係咪㗎？」





「你試下咪知。」「不要著燈 能否先跟我 摸黑 吻一吻
如果我 露出了真身 可會被抱緊
驚破壞氣氛 誰都不知我 心底有多暗
如本性 是這麼低等 怎跟你相襯」

由細到大，雖然表面只係對異性有所抗拒，但我近排先發覺，原來以前嘅自己直情係自我封閉得好厲害，就連身邊嘅人，我都冇辦法百分百去信任同依靠佢哋。

直至阿南嘅出現，如果我係無盡嘅黑暗，佢就係源源不絕嘅光明，佢總可以令身邊所有人快樂，本來我以為，我哋都係喺兩個極端中生活嘅人，永遠都唔會有交集。

「情人如若很好奇
要有被我嚇怕的準備
試問誰可 潔白無比
如何承受這好奇 答案大概似剃刀鋒利
願赤裸相對時 能夠不傷你」但無論我心入面塊窗簾閂得幾實，佢呢道強光都總係有辦法進入我嘅心窗，令我明白，點解呢個世界咁需要光。世界只有黑暗，真係會錯過好多身邊嘅人和物。佢令我明白，我唔係得自己。我有老豆、有果三個雖然口賤，但有乜事總會第一時間出嚟撐我嘅兄弟，有雖然行徑好古怪，但又好投契嘅阿月，仲有，無論點都好支持我嘅佢。





「幾雙手 幾雙腿 方會令你喜歡我
順利無阻 你愛我 別管我
幾雙耳朵 共我放心探戈」

曾經我覺得，自己都算係一個冷靜灑脫嘅人。哈，原來喺愛情面前，我可以失曬常性。

直到阿南婆婆走咗之後，我先發覺原來我唔可以失去阿南，我好想令佢快樂、令佢幸福，縱使我好害怕，害怕佢有一日會好似我老母咁，突然離我而去，所以曾經有所卻步，唔太想承認自己對佢嘅好感，但始終逃避唔到自己嘅情感。

唔知你係咪呢，歐陽南？

「如何承受這好奇 你有沒有愛我的準備
若你喜歡怪人 其實我很美」