《想溝到女千祈唔好學我咁》: 8.4

「你由細到大，見圍住你嘅朋友都係阿星阿雄佢幾個，從來都冇見你提起過有女仔朋友，仲要每次提起你學校啲女仔，你都會好唔耐煩咁。」

「我知道唔係啲女仔衰，係你忘記唔到你阿媽，所以先對啲女仔咁有戒備係唔係？」

「係。我好憎佢嘅不顧而去。我曾經以為，所有女仔都會好似佢咁衰。」今次我冇逃避到，而係好咁肯定咁答。我諗，大概都係因為阿南俾呢個勇氣我去面對過去。

「講個秘密你聽，但呢個秘密可能會令你仲痛苦，你會唔會想知？」

「想。」





「其實當年我先係你阿媽同果個男人之間嘅第三者。」

「吓？」「當年佢哋有一啲誤會而冷戰，喺你阿媽好傷心嘅時候，我先乘虛而入。人喺痛苦嘅時候最容易做錯決定，佢轉投咗去我懷抱，之後仲結婚、生埋你。直至佢哋重遇，搞清楚所有誤會，先發現原來彼此仲係好鍾意對方。」

「咩誤會？」

「咩誤會唔重要，重要嘅係，既然上天安排佢哋嘅重遇，就代表佢哋先可能係最應該一齊，我始終都只係一個過客。」

「大曬啊？就可以丟低我哋唔理咩？」我好冷靜咁問。





「其實佢咁多年嚟都唔見你，係我嘅要求。做錯嘅人係我，我唔想我同你嘅存在再令佢有啲咩牽掛，而且我相信我自己係可以養得起你。」

要求佢就應承，都唔知話我阿媽係守諾定殘忍嘅人好。不過唔知點解，我半點嬲嘅情緒都冇。

仲覺得，原來真正嘅聖人模式，先係我老豆呢隻。我都唔能夠相信，真係可以有咁偉大嘅人，將平日對病人嘅大愛應用埋落家庭。我只係覺得好笑，原來我嘅存在，係一個錯誤嘅決定。

甚至覺得，如果冇咗我，可能成件事會簡單好多。

「恭喜你做到。」我同佢碰杯，當然我知道佢嘅唔容易。當年我細個，佢每日返工嘅時候我就喺住附近嘅阿星屋企逗留，直至佢放工先會湊返我。到我大個啲，可以獨立少少嘅時候，佢已經變成更加忙嘅人，成日要出席唔同會議同演講，返到嚟仲要煮飯，講真父親呢個角色，佢真係滿分有突。





聽完佢咁講，我先發現，一個啱嘅人同啱嘅時間，對於一段關係係幾咁重要。我發現身邊真係好多錯配嘅人同事。子晴同洛賓、阿星同阿月、老豆同老母...如果佢哋都可以喺啱嘅時間遇到，會唔會就少好多痛苦？

洛賓同阿星我唔知，但至少我估我會喺一個比較快樂嘅家庭長大。

不過唔係因為呢個背景，又未必會拉近好多我同阿南嘅距離，所以你話係好定差，我都冇辦法俾一個正確嘅答案你。我淨係知道，對嘅人我已經遇上，唔想再錯失對嘅時機。「仔，我試過同唔同女人開展關係嚟麻醉自己，但始終冇一個可以代替你阿媽嘅位置，佢真係我最愛最愛嘅女人，當你遇上你鐘意嘅人，你千祈唔好放手。」

「你又話女人信唔過？」我問。我唔明白點解佢咁鼓勵我爭取。

「我幾時有講過？」

「我細個你飲醉講囉。」

「飲醉講嘅嘢你都信？」

「咩唔信啊，我信咗十幾年啊。又話酒後吐真言？」





「你未醉過你唔知，係『借醉後吐真言』，真醉嘅人講果啲一律當係廢話就得。」

我最無言以對嘅，竟然係呢一刻，為咗佢一句醉咗之後嘅「廢話」，令我耿耿於懷咗十幾年。

「好好笑啊老坑？」我忍唔住挖苦佢。不過因為老豆嘅鼓勵，我腦中竟然真係...泛起表白嘅念頭。聖誕節、禮物、浪漫時刻，一定係表白嘅好機會！

「送咩好！送咩好！」之後，我馬上召集佢哋幾個，睇下收集倒咩意見。

知道咗我打算表白之後，阿柔同嘉慧亦都話要傾埋一份，佢哋係阿南最好嘅朋友，我當然求之不得。

「手作嘢囉，有心思。」阿星率先講。

「唔係個個都好似你咁又識整蛋糕又識織嘢。」洛賓回應。今次我撐佢，咪睇阿星大大隻隻，但如果學校有家政科佢應該年年考第一。





「送個簽名嘅籃球俾佢夠有紀念性！佢又鍾意打籃球。」嘉慧建議。

「我又唔係球星，簽個名上去做咩？」我問。

「有冇啲咩喺你哋之間係好有回憶嘅嘢嚟啊？呢樣應該得你自己諗到。」阿雄講出一樣好重要嘅嘢。

好重要嘅嘢…