《想溝到女千祈唔好學我咁》: 8.3

「你有同學嚟咗啊？」佢喺門外問。

「喔...係啊。」

「會唔會喺到食飯啊？」我望向阿南不斷搖頭，點知阿南就係咁扤頭，仲好似好興奮咁。

「喺...喺啦。」我好無奈咁答。

「點解你一啲都唔緊張？」老豆行開咗之後，我問。





「你知我志願係乜㗎！仲唔爭取機會取下經咩！」其實我都唔明白，點解我會同啲醫生，或者想做醫生嘅人咁有緣，但偏偏自己完全對呢方面冇興趣。

「咁又係。」

「你阿爸都幾勁，揸完手術刀返嚟又揸鑊剷。」

「咁佢係幾盡責嘅咁多年嚟，從來都將工作同我好平衡咁分配。」

隔多一陣，當聽到有啲炒餸聲，阿南就話忍唔住想出去睇。佢跟住我尾，掂起腳尖咁細細步行，然後匿喺我背脊後面𥄫。「你好啊，阿南小姐。」阿爸似乎察覺倒我哋嘅出現，背對住我哋同阿南打招呼。





「Uncle都識我？」阿南好奇咁問。

「阿正成日都同你Whatsapp傾偈，我估係你嚟掛。」阿爸好輕描淡寫咁形容佢偷睇我電話。

「係你自己電話周圍放，我先望到炸。」估到我下一句想責怪佢嘅時候，佢即刻再解釋。

「咁Uncle冇估錯即係證明阿正佢冇同其他女仔成日傾計。」喺老豆面前，阿南叫返我做阿正，呢次好似係佢第一次咁叫我。

「你地坐陣啦，好快有得食。」老豆講。





「你老豆都幾健談，點解同你咁唔同？」

「要每一個做手術嘅人都相信你，唔健談點得？」「你老豆都幾靚仔，點解同你咁唔同？」

「死啦你。」我冇佢咁好氣。

「你老豆咁...」

「你係咪懷疑我唔係佢親生？」

「少...少少。」佢一路講一路偷笑。

我原本以為，喺呢個場合中應該會係好尷尬，點知又意外地幾融洽，喺食飯果陣，阿南不斷同老豆分享我喺學校啲嘢，又問咗老豆好多關於做醫生嘅要事。知道老豆曾經救過幾多人之後，阿南不禁對佢讚不絕口。

反而我好似搭檯咁，半句說話都搭唔到嘴。





「Uncle你真係好勁，第時我都要做個同你一樣咁好嘅醫生。」佢向老豆闡述咗自己嘅理想之後，就喺到發表佢嘅豪言壯語。「好啊，靠你延續唔同病人嘅生命喇。」從阿爸嘅回應中，佢好似幾欣賞阿南。

「但你最犀利嘅，都係一個人養大阿正。」阿南突然講。

「咁佢又唔難養嘅，由細到大都算乖，除咗性格係怪咗啲。」

「改咗好多㗎啦！」阿南為我護航。

「咁係因為阿南你姐，喺學校靠你睇住佢喇。」老豆都睇得出，我近來嘅轉變好大原因都係因為阿南。

「一定！」阿南搭住我膊頭，單曬眼咁講。

食完飯之後，阿南同我幫手洗碗，而老豆就去咗沖涼。冇幾耐，佢就返咗屋企，老豆都邀請佢下次再嚟食飯。其實佢喺到嘅短短幾個鐘，屋企出現久違十幾年嘅熱鬧，所以佢就走咗之後，呢到再次變得寂靜，缺乏生氣。「阿南唔錯，幾純品。女朋友？」當我坐喺梳化玩電話嘅時候，老豆攞咗兩罐啤酒過嚟。





「唔係啦，只係同學。」

「唔止帶過返嚟屋企一次喇喎。」佢將啤酒斟落個酒杯，再遞俾我。

「你唔洗返工咩？」我問。

佢擰擰頭：「聽日放假。」

「佢屋企早排有啲事，所以先借宿一宵。」我答返佢嘅問題，我估佢打掃嘅時候，已經一早發現有啲殘留落嚟嘅長頭髮。

「你有冇意思先？」佢問，但我冇答，只係攞起酒杯飲酒。我發現一遇到唔想答嘅問題，我就會不自覺咁樣做。原來呢個習慣，由果陣時已經開始。