《想溝到女千祈唔好學我咁》: 7.8

「對唔住啦阿南，我唔想你一個人面對。」喺我走咗之後，阿柔講咗一句我聽唔倒嘅說話。「去邊？」我上到一架的士，先發覺，原來我冇問到喺邊間殯儀館。

「鈴鈴鈴！」呢個時候，電話好似及時雨咁響起。

「喂！九龍殯儀館啊！」係阿星，阿柔叫佢同我講返係個地點。

「九龍殯儀館！快！」我對住司機大叫。

一路上，我都十分自責，既然尋日察覺到佢嘅反常，點解唔多口問多一句？





原來尋日枕頭上嘅，唔係濕潤嘅頭髮，而係傷心嘅眼淚。

傻阿南，唔俾我望住你，係怕我會見到你喊嘅一面係咪？

點解你有事你都唔同我講？點解喺我面前仲要扮到若無其事？點解咩都要自己攬曬上身？

我真係個大白痴，仲話要撐住佢，但當有事發生嘅時候，我反而係最後一個先知道。「唔洗找！」到咗殯儀館之後，我隨意丟低咗一張銀紙就落咗車。

「死啦咩府呢？」而家有八個禮堂都做緊白事，無計可施之下我只好逐個禮堂搵。每經過一個禮堂，見到唔同先人嘅遺照，心底都會泛起一陣莫名嘅寒意。





直至搵到第六個，一個細細嘅禮堂入面人唔係好多，令禮堂顯得有啲冷清。所以即使我企喺遠處，都好容易就認到果個，著住麻衣、燒緊衣紙，喊得好傷心嘅佢...

呢次係我第二次見到佢喊，唔同嘅係，今次我嘅心都不自覺咁變得好痛。

「先生，你識我媽媽？」喺我隔離路過嘅中年女人問。

「你係...阿南媽咪？」我反問。

「係啊，你係...？」





「伯...伯母你好，我係阿南嘅同學。」望真啲伯母個樣，先明白阿南點解會生得咁靚，原來係有好優良嘅遺傳。「喔，有心啦，入去坐啦。」佢好黯然咁講。

「啊...等陣。」當我諗住封返帛金，但我摷勻銀包，得返一張五百蚊紙同一個裝護身符嘅利是封，早知頭先就叫個司機找錢...

「爭一蚊...啊！」好彩頭先幫阿月買珍寶珠，個姐姐找返一蚊俾我。

「小小心意。」我將帛金交到阿南媽媽手上。

「有心、有心！」之後佢就帶我去靈堂入面。

「有客到！賓客請留步！」堂官聲如洪鐘嘅開場白吸引靈堂入面嘅人望過嚟，當阿南見到我出現時，原本已經喊得好傷心嘅佢，眼淚更加不自控咁流落嚟。

當完成堂前三鞠躬後，我行到佢前面，佢二話不說就撲向我懷抱大喊。我能夠做嘅只有不斷輕撫佢後尾枕安慰佢。

「點解...點解你會嚟，我叫咗阿柔唔好同你講...嗚嗚嗚。」





「傻阿南！」我不斷咬緊牙關，我怕一放鬆，就連我嘅淚腺都會失守。