《想溝到女千祈唔好學我咁》: 7.7

「咦阿正，你做咩坐喺地下？」喺我沉思嘅一刻門被打開，老豆嘅樣出現咗喺我眼前，原來真係佢返咗嚟。

「啊，未沖涼嘛。」

「喔，咁俾我沖先？沖完煮飯。」佢講。

「慢慢啦。」

咁到底阿南係幾時走？點解要走得咁無聲無息？





我摸一摸枕頭，希望感受佢留下來嘅餘溫同香氣，發現仲有少少暖，咁應該走咗唔係好耐。而且仲有少少濕濕哋，肯定係佢頭髮未乾就瞓咗落去先搞到咁。

我：「幾時走？」

我send咗個Whatsapp搵佢，點知等咗成晚佢都冇覆到，但不斷見住佢上線下線，證明佢都仲係安全。

「卓正，今日南南請咗假，麻煩你落去攞一攞點名簿。」第二日返到學校，Miss Lam同我講。「喔，咩事請假？」尋日仲好哋哋...

「同學嘅私人嘢唔方便講嘅，但今日要辛苦你做埋佢嘅嘢啦。」





「喔。」

唔做唔知，原來每一日阿南要負責好多嘅班務。除咗每日兩次嘅點名，又要負責追齊啲通告、佢仲會幫班上面一啲唔出去食飯嘅同學訂埋飯。今日仲撞正係PE堂，要等所有人落曬操場先可以鎖班房門，落堂之後又要第一個衝返上嚟開門。

佢一直都做好曬啲嘢，從來冇要求過我幫手，應該係因為知我怕麻煩，而咁啱我又好不負責任地從來冇問過有冇嘢需要幫手。

午休果陣，我同阿月喺操場上散步，行到小食部，佢係都要我請佢食珍寶珠。

「你唔係咁孤寒啊？」





「唔係...請囉。」「細路，找一蚊啊！」我未攞返找嘅錢，就走咗去。

阿月見我好呆滯，就好八掛咁問我咩事。

「冇，唔夠瞓姐。」

「唔似喎，好似好多嘢諗咁就真。」佢食住珍寶珠咁講。

「咁你都睇得出？」

「講嚟聽吓等姐姐幫下你分擔啦。」

「你有冇試過，個心會突然玀玀攣咁？似係因為...唔見咗一啲嘢。」我好隱晦咁問。

「係人定嘢啊？」但始終瞞唔過佢嘅法眼。





「...人囉。」

「喔，掛住阿南啦。」

「痴線。」

「仲扮嘢，見你成日偷望佢啦！」乜真係咁明顯？

「喇細路，阿姐我鍾意人果陣你仲食緊開心樂園餐。要唔玀玀攣得一個方法，搵佢啦！」車！仲以為佢會有咩好提議。「搵咗啦，佢都冇覆。」

「冇覆咪搵到覆為止！」

「唔啦，煩住人又唔太好。」





「你諗你啦。我搵阿柔！」原來阿柔同阿星就喺我哋前面，阿柔個樣仲憂心忡忡咁。

「唔知阿南點呢？」我哋行到去佢哋面前，阿柔講。

「做咩事？」我好急切咁問。

「佢阿婆早排過咗身，今日舉殯。」阿星答。

「唔早講！」我幾乎怒吼。

「我都係啱啱...喂你去邊？」佢未講完，我已經一支箭咁向住校門跑走咗。

「去啦飛雲！去追尋你嘅幸福啊！」喺跑動之際，仍然聽倒阿月對我嘅呼喊。