《想溝到女千祈唔好學我咁》: 7.6

「噢啲咩？」

「噢...估唔到你手腳咁長，咁都著得落。我仲以為會大添。」

「唔係啊，啱啱好。」

「喔...咁就好。」

「喂，咸濕仔，望完未！」佢輕拍我額頭，冇錯，我嘅眼光停留咗喺佢迷人嘅身體上。





「冇…冇啊！你係咪瞓？我帶你入我房。」

入到我房之後，佢步伐好輕咁行到我床邊坐低，然後四周圍望，明明間屋冇人都好似做緊賊咁。

「望咩？」

「呢個就係你每朝早第一眼望到嘅場景。」

「係啊，咁又點？」





「冇啊…冇嘢。」

「你瞓啦，瞓醒Whatsapp我就得。」帶佢入房之後，我馬上搵藉口離開現場，我驚再留喺到，我真係會把持唔住。

「喂喂…你可唔可以喺到陪我，直到我入睡？」

「吓？」「你唔好亂諗啊，你冇沖涼，唔準上床啊！你…唔會做到啲咩！」佢越講越細聲，越講越口齒不清。

「痴線，我係會亂嚟你已經渣都冇。瞓啦！」我坐咗喺離床頭有一段距離嘅衣櫃旁邊，保持住我嘅君子作風。





「坐過嚟呢邊啦。」佢已經瞓咗喺到，冚好被，一副準備入睡嘅模樣。

「背住我。」佢答。

「咁多要求㗎。」但我都係乖乖照做。

「唔想俾你見到我咁殘嘅樣。」佢一邊講，一邊撥弄我啲頭髮。講起嚟都係，近排嘅佢憔悴咗好多，亦成日冇乜精神。

「放心啦，殘極都仲好靚。」我答。

「壞人…進步咗喎，開始識哄女仔。」

「多謝你囉，南姐姐。」

「你係咪淨係會哄我㗎咋？」「當然。」我講，我唔知呢啲算唔算表白，但我當刻好想俾佢知我嘅感覺。我好想話佢知，佢唔搵我嘅日子，其實我好忐忑不安，既唔知我哋之間發生咩事，又怕其實係佢身邊發生咗咩事。





但同時我又好軟弱，唔敢搵佢，總覺得自己冇資格去管佢咁多。

不過之後，佢就冇再講嘢，好快、好安靜咁入睡。

快到我句「當然」，或者佢都未來得及聽入耳。

而佢甜睡嘅樣，令我好入神咁望住佢，不知不覺間，我都唔小心咁瞓著咗。

我記得我發咗個夢。

夢入面有兩隻手伸咗喺我眼前拖住我一路向前行，一隻手好厚大，另一隻手好似牛奶咁纖滑，但突然間，果隻好纖滑嘅手突然放開咗我，仲自己越行越遠。

得返個隻好厚大嘅手仍然拖實我。





冇耐，又有一隻好幼嫩嘅手主動拖實我。但發現，無論我隻手點揮，隻手都好似透明咁不斷被我穿過，捉極都捉唔實。

「嘭！」一下嘭門嘅聲音喺房外傳嚟驚醒咗我，我腦中突然傳嚟老豆返嚟嘅訊息，於是打算即刻叫醒阿南，之後先發現，床上得返一套摺好嘅衫褲，係佢頭先著嘅。

原來佢已經走咗。