《想溝到女千祈唔好學我咁》: 7.5

係咪呢？我唔知，但佢確實喺我眼中係一個特別嘅存在。

「壞人！今日放學一齊返屋企好唔好？」直至有一日，佢終於搵返我。

「喔，好。」

沿路行到地鐵站，大家都冇出聲，係識佢咁耐，佢第一次咁沉默。

「呢排好忙？」我主動打破僵局。「嗯...我可唔可以上你屋企？」佢突然問。





我知你哋諗緊乜，當刻我第一時間都係諗到啲色色嘅嘢，但好快已經俾理智壓制。

「點解？」我好奇一問。

「唔得都冇所謂嘅。」

「唔係！」我即刻答。「可以啦，屋企冇人。」

搭車果陣，班地鐵太多人，喺啲人嘅擁擠之下，即使我努力保持距離，我同阿南都幾乎緊貼住對方。佢將個頭輕靠住我嘅胸膛前，更加令我僵硬到唔敢亂郁。





「你心跳好快。」佢講。

「你知我冇同女仔咁親近過。」我答。

「同阿月都冇？」

「緊係冇。」之後佢就冇再講嘢，佢係咪真係介意我同阿月嘅親近？但我冇開口問到到，就咁由佢繼續挨到落車。去到我屋企個站，佢一直跟貼住我行，好似怕一走失就會俾豺狼擔走。上到屋企，果然老豆未放工。我好熟練咁除鞋、放低書包、去洗手間洗手。而佢就不斷圍住我間屋參觀。

「喂，洗手先。」我講，我老豆最重視衛生，可能係職業病，但由細到大嘅習慣都令我都不自覺仿效。





「你間屋好大。」佢一邊洗手一邊講。

「係幾大嘅。」喺佢面前，我都唔洗扮謙虛。

「我就唔同，一間細公屋，每日返到屋企都係逼逼狹狹，行多步都冇位。」

「但你屋企有你婆婆陪，但我成日都係一個人，咁空都冇用。」

「咁我上多啲嚟陪你得唔得？」佢問。

「你唔介意嘅話都得。」佢咁樣問令我有啲詫異，總覺得今日嘅佢充斥住一份唔自然，一份刻意拉近距離嘅唔自然。

「嗯...多謝你。」

「你都未講上嚟做咩。」





「可唔可以...借你張床瞓吓？」「吓？上嚟瞓覺？」

「嗯嗯！」

「你未沖涼喎。」

「咁...沖囉。」佢臉紅紅咁講。

我將全屋最細碼嘅住衫褲交俾佢，然後佢就入咗廁所沖涼。冇耐，花灑傳嚟緩緩嘅灑水聲，好似交響樂咁喺我耳旁響起，真係令我心煩意又亂。我不斷搵嘢分散自己嘅注意力，反而更加專注幻想浴室入面嘅情況，更唔好講「小正」一早已經係奮勇嘅作戰狀態。

我忍唔住去雪櫃攞兩舊冰敷住自己額頭，先可以令自己情緒同生理反應降溫。一早知會搞到咁狼狽，就唔俾佢上嚟。

經過一場天人相爭嘅腦交戰，佢終於喺廁所走出嚟。





「噢…」

從廁所噴出嚟嘅蒸氣喺佢身邊縈繞，佢輕擺住柔若無骨嘅身軀行近我，並將毛巾掛喺後頸，然後輕搓濕漉漉嘅長髮，著住白衫嘅佢就好似仙女下凡咁。最令人心跳加速嘅係，透薄嘅衫隱隱約約咁輕露出佢嘅黑色胸圍，令第一次望見女仔胴體嘅我亦忍唔住輕嚥一啖口水。我發夢都冇諗過，呢個畫面會喺我屋企，甚至我嘅人生出現。