《想溝到女千祈唔好學我咁》: 7.2

「你唔好亂嚟。」我警告佢。

「咁你記得睇住我。」佢突然用一個充滿誘惑嘅聲線講。

「痴線。」

一入到戲院，阿月已經俾好似唔洗錢嘅冷氣凍到打咗幾個乞嗤。

「抵啦，睇戲仲著背心。」我特登挖苦佢。





「出門口熱啊嘛....乞嗤！」

「著住啦。」我將外套遞俾佢，如果唔係我諗佢未開場已經凍死咗。

「唔...唔該。」佢羞怯咁接過我嘅外套，就好似一個細路女，同佢平時嘅形象完全唔同。

「話時話，我哋睇咩戲？」原來佢唔知睇咩戲就跟嚟。

「《被偷走的那五年》。」本來以為阿月一定會全情望實阿星同阿柔，估唔到佢反而好投入劇情，喺笑位會跟住笑，浪漫嘅情節會突然發花痴。而有睇過套戲嘅都知，去到劇情後段，簡直係慘無人道。個女主角應該前世係個十惡不赦嘅大壞蛋，今世先要受到唔同嘅折磨。去到女主角臨終果一段，身旁嘅幾位女士已經喊到收唔倒聲，連硬朗嘅嘉慧都喊到好似黃河缺堤咁。





「嗚啊！」阿月更加喊到哇哇大叫，令全場嘅人都望住佢。

「殊...咩事啊你？」我細細聲問佢。

「好慘啊嘛！」佢繼續喺到喊。

「你嘈住人啦！」

「嗚嗚嗚！！」我忍唔住用手掩住佢個口，我驚未睇完戲就會俾人趕出去。





到底佢係咩事？點解佢可以好似第一次睇戲咁？夠膽死喺戲院大吵大鬧。我理解唔倒，平時一副壞女孩形象嘅佢，鍾意玩弄人心嘅佢，竟然會因為呢啲老套到死嘅劇情而大喊。如果係假嘅眼淚，亦未免假得太真。直至睇完戲出返商場，佢對眼已經喊到腫曬。妝都化埋嘅佢，亦引到我哋不禁失笑。但或者呢個咁「凡人」嘅舉動，將佢嘅形象即刻變得貼地好多，亦打破咗佢同阿柔仲有嘉慧嘅隔膜，佢哋竟然開始有講有笑。

「女人嘅友情真係如天氣一樣善變。」我答。

「咁好傾得唔得㗎？」阿雄問阿星。

「得...得掛。」

「唔係好得啊？」我諗返起阿月睇戲之前講嘅嘢，突然覺得有啲唔妥。唔知佢會對阿柔做出咩舉動，所以我決定將佢喺閒談中拉走，再叫阿雄同阿星攝返位。

我都估唔到，我竟然會主動拖住一個異性，就算係阿南都唔會。

「做咩拉走我啊？傾得好哋哋。」

「廢時你亂講嘢。」





「呵，你又知嘅，我準備同阿柔攤牌㗎啦。」

「真係咩？」