《想溝到女千祈唔好學我咁》: 7.3

「緊係啦，唔係等幾時？今日之後就冇人同我爭阿星啦，哈哈哈哈！」佢發出好狂妄嘅笑聲。

「我唔會俾你得逞。」我好認真咁講。

「嗯…」佢突然喺到狂笑，但今次係好純粹嘅大笑。「你咁都信…哈哈哈哈！」

呢一刻，我先知自己做咗傻仔，枉我仲咁認真講啲咁中二病嘅說話。

「好啦，見係你就同你講，我放棄阿星了。」佢突然好認真咁講。





「吓？」

「睇完戲之後，我就知道，我唔會取代倒阿柔。」佢一邊講，一邊望住前方傾得好開懷嘅阿柔同阿星。

「當睇緊戲果陣，望住阿柔好放心咁挨落阿星到喊，我就唔忍心拆散佢哋。」

好放心嘅感覺？就好似阿南挨落我膊頭瞓覺咁？

「佢一定好需要阿星。」佢再答。「一早話你唔會取代倒。」我答。





「當我第一眼見到阿星望住阿柔我就知。佢無論食飯、行路、打波，甚至放空，諗住嘅都係阿柔。」

「咁你仲話一定要追到佢？」

「其實唔知㗎，不過我最討厭未嘗試過就認輸。但當我見到阿柔會因為我嘅出現而唔開心，證明佢都鍾意阿星。」其實我哋一直都冇好深入去了解過阿柔嘅內心世界，所以每次見到阿星咁努力追求阿柔，口講就支持，但每次都好怕佢會再換嚟失望。

估唔到，我哋一直以嚟嘅多慮，好輕易就俾新嚟冇耐嘅同學化解咗。

「你好勝心都幾強。」雖然係咁，但幸好佢都係一個明白事理嘅人。





「唔係好勝，係我見過太多人因為唔爭取而後悔嘅例子，你諗吓，如果頭先套戲個男主角唔去追返個女主角，你估到女主角臨終時佢會點？至少而家佢都有機會陪女主角行完最後一程。人最遺憾嘅唔係失去，而係主動放棄。」佢扮到好唔在意咁講，但又好似經歷過好多嘢先會有咁嘅感悟。

「不過你知道嗎，就算你得到一啲嘢，都唔代表可以擁有佢。」喺我仲消化緊佢嘅說話果陣，佢再加多句更高深嘅說話。「所以你為咗唔想放棄一時嘅感覺就不惜一切轉校？」

「吓，都唔算不惜一切，冇成本㗎喎。」

「咁都冇？下年考公開試喇喎。而家先轉校，所有嘢都要從新熟習過。」

「傻㗎你？我似係需要讀書嘅人咩？」