《想溝到女千祈唔好學我咁》: 7.1

「死仔。」洛賓將阿雄攬入懷裡，好一個溫馨但基情四射嘅畫面。

當我哋扶洛賓去醫療室包紮時，偶然撞倒準備離開嘅子晴。

「恭喜你...打得好好。」子晴講。

「多謝你。」洛賓回答，然後佢喺子晴離開之時叫住咗佢。

「送俾你。」





子晴愕然地望住洛賓，眼眶隨即泛起淚水，我諗佢都驚訝天意嘅弄人，當自己投入真感情時，對方就當佢玩具咁玩；當身邊有一個真心對自己好嘅人，又因為之前種種發生嘅事而令佢哋唔可以毫無芥蒂咁交往。

「唔好啦，留返俾真正值得你送嘅人啦。」佢強顏歡笑咁講，然後頭也不回咁離開。

「得啦，佢一定感受到。」阿星安慰洛賓。

如果，佢先遇到嘅係洛賓，我唔敢肯定佢可以得到真正嘅幸福，但結局一定會比而家呢個更好。可惜現實係唔會有如果，發生咗嘅嘢係改變唔到，正如阿星遇上嘅，都係阿柔而唔係阿月先。

「喂，阿正，我同阿雄星期日去睇戲，你去唔去？」阿星問我。





「可，幾點？」

「四點半，嘉慧同阿柔都會去，但阿南就唔得閒了。」

「阿雄哥連史前生物都搞得掂，威啦。」我講。都唔知阿月嘅到嚟係害咗阿星定幫咗阿雄，阿雄因為調咗去同嘉慧坐，喺接觸多咗之下，加上阿雄上次球賽嘅表現，佢哋竟然有突破性嘅進展。

如果我當時有未卜先知嘅能力，再話佢知第時佢哋仲會結婚，唔知佢會唔會嚇死？

「努力中努力中。」阿雄自豪咁講。





「睇咩戲啊？我又去！」阿月一聽到有戲睇，就好雀躍咁講。

「你放過我啦，小姐。」阿星喺到求饒。

「嗯...得，我都係要去，但如果阿正請埋我睇，我最多唔阻住你同阿柔。」「係咪㗎，咁好死？」阿星問。

「咁我唔請呢？」我問。

「咁我咪照去，然後就纏住阿星！」

阿星即刻向我投向求救嘅眼光，我就知道，呢張飛我走唔甩。

「大家好！第一次同大家出街，多多指教！」果日我哋約咗喺商場中庭等，阿月一嚟到就好熱情咁同大家打招呼，佢著住一件熱背心同短褲，微微鞠躬果陣，果條深長嘅乳溝喺我哋眼前若隱若現，突如其來嘅誘惑都令到我哋幾個男仔有啲手足無措，更令兩位女仔醋意大發。喺行去戲院嘅途中，佢哋都刻意帶走阿星同阿雄，淨低我同阿月喺後面跟住。

「你跟埋嚟做咩？搞到我冇得同佢哋行。」我講。





「咁我要𥄫住阿星同阿柔，唔俾佢哋太親密！」

「你又話唔阻住佢哋？」

「話之嘛，我夠話要追到阿星俾你睇！」阿月講，果然女人嘅說話都係信唔過。