《想溝到女千祈唔好學我咁》: 2.2

去到中二，我哋已經唔喺同一班，所以接觸亦更加少，但佢歐陽南嘅大名開始喺學校傳開，每個人都會想同靚女做朋友。加上佢加入咗籃球校隊，經常喺唔同班際、社際比賽中大放異彩，令到男男女女都成為佢裙下之臣。而我，只係某一班嘅某一個學生，冇乜特別嘅才能，只有成績叫做幾好先有人記得我。生活毫無目標，朋友都依然係果幾個，每日最大嘅娛樂就係等待第二日嘅來臨。



一粒閃閃發亮嘅星，永遠都唔會及一顆明月耀眼，何況我呢一粒，只係一粒黯淡無光嘅星？



「係咪呢，俾曬機會你去識人，你又唔好好珍惜。」有一次，歐陽南嘅比賽中，我哋喺課室到睇，因為望落窗就係籃球場，佢再一次出色嘅表現，令大家都好落力幫佢打氣，阿雄就喺呢個時候潤我。







「痴線，關我咩事。」



「人哋而家係籃球女神就真係唔關你個無名氏事啦。」洛賓都喺到嘲諷我。







「女人好咩？又煩又難捉摸，少識為妙啦。」我答。



「咁唔係個個女人都係咁嘅，我三個家姐都唔係個個性格一樣啦，你唔去認識點知。」阿星講，佢屋企有好多女人，除咗一個阿媽三個家姐，仲有兩個姑媽一個姑姐，名副其實成屋女人，所以佢覺得自己對女性有好深厚認識。



「算數啦，佢受到咁大陰影籠罩，孤獨終老㗎啦。」阿雄講。







「嘩你睇，樂芷柔都好好波！」阿星突然大叫，引我哋都望落球場。



「邊個波先？」阿雄笑淫淫咁問。



「緊係打波啦頂你！」阿星即刻面都紅曬咁講。



「知你猴住人地個『波』好耐啦，成日經過都望。」喺落井下石呢方面，洛賓真係永遠都不遺餘力。







「邊有啊！」佢塊面越嚟越紅。