《想溝到女千祈唔好學我咁》: 2.1

但你點呃得倒自己，都呃唔倒自己嘅思緒，腦海中，不斷浮現返唔同嘅片段...有關我同阿南嘅回憶。



應該由邊到開始講起好？或者應該由我童年講起。記得小學嘅時候有一晚我瞓著咗之後，客廳突然之間好嘈，係我老豆同老母喺到嘈交，仲鬧咗好耐，當時我根本唔明佢哋喺到講咩，總之，當我第二朝起身之後，我老母就唔見咗，從此都亦再冇見過佢。



失去咗枕邊人，我老豆又冇變得一蹶不振，身為醫生嘅佢好努力咁維持我生活嘅富足，亦因為佢嘅專業而喺醫學界變得享負盛名。不過自從老母走咗之後，佢冇再結過婚。







甚至有一晚，老豆飲到爛醉如泥咁返嚟，攤咗喺梳化。佢叫咗我埋去攬住我，自從老母走咗之後，佢都冇再攬過我。我到而家都好記得佢攬住我果陣嘅溫度，好暖和。而家諗返起，當然只係醉酒之後體溫嘅飆升。



佢朦朧之間講咗句：「唔好相信女人，信唔過…信唔過…」







唔知係咪因為呢句說話，定因為呢一連串嘅經歷，令我對任何異性都產生咗一種生人勿近嘅抗拒，所以對歐陽南嘅第一印象，都係個麻煩嘅人。



每次喺課室見到佢，佢都係好開心咁笑住，令佢好快已經融入到唔同同學嘅圈子，仲同班上幾個女仔成為好朋友。喺我眼中，都只係一種討好人嘅手段，透過拉攏唔同嘅關係令自己可以喺學校生活得好啲。而我依然只係會同啲男仔玩，以前我會覺得呢種叫做我行我素，但若干年後先知道，世人已經為呢種人賞賜一個詞語：「毒撚」。



開學日之後班主任都冇再特別調位，我順理成章成為佢嘅傾訴對象，佢幾乎每樣嘢都會同我講，但每次我都只係聽，冇乜反應。其實我都唔想，只可惜我唔係聾人，但至少啞都可以扮下。







喺佢嘅「單方面對談」中發現，如果要用一樣嘢去形容我地嘅關係，我地應該係指南針上面嘅南面同北面，無論性格、喜好都好極端，永遠都係南轅北徹。



我鐘意睇小說，佢鐘意打籃球。



我鐘意魯迅，佢鐘意陳奕迅。



我唔多鐘意講嘢，佢就滔滔不絕。







或者佢都感覺到我對佢刻意嘅冷漠，久而久之，佢都越嚟越少同我講嘢，我哋嘅交集，亦都喺下一次嘅調位中結束咗。