《想溝到女千祈唔好學我咁》: 2.3

樂芷柔，同歐陽南係球場上嘅黃金組合，除咗球技了得，仲一樣有天使嘅臉孔，只係佢比歐陽南多咗一副魔鬼般嘅惹火身材，只不過中二，身材已經玲瓏浮凸，我估果陣已經有32C...可能有D。阿星喺小學嘅時候，已經好傾慕阿柔，佢嘅一顰一笑都會令阿星神魂癲倒。



「你再笑佢女神佢喊㗎啦。」今次終於到我可以挖苦返佢。



我哋四個，就係咁樣渾渾噩噩咁，每日吹下水，講下笑，就過完初中生涯。去到中四，會係所有同學最轉折嘅一年，除咗因為已經揀好未來三年會讀嘅科，亦都唔會再年年分班，同一班嘅同學就會對到畢業。







好彩嘅係，我哋四個，仍然可以一班，唔好彩嘅係，有一班固定嘅同學，大家熟咗之後就會有一堆難以避免嘅麻煩事。



「好啦，大家都知我新嚟咩都唔識，所以我哋好需要有能力嘅班長，去幫助我解決一啲班中嘅要務。」班主任Miss Lam係今年新嚟嘅年輕老師，所以完成咗一啲開學嘅瑣碎事，就先選咗班上唔同嘅職位。







「女班長緊係阿南啦！一個阿南頂全家啊！」一把豪壯嘅聲音響起，但又冇男性聲線嘅低沉，唔留意嘅話仲以為係邊個男同學仲未變聲。



「嗤，佢把聲成隻老牛咁。」阿雄忍唔住笑咗出嚟。



「你笑咩啊莊偉雄！你把女人聲又好好聽啊？」原來講嘢嘅人係嘉慧，聽到阿雄咁笑佢即刻起曬槓咁大罵阿雄。







「好啦好啦，唔好鬧交！邊個係阿南啊？」Miss Lam見狀即刻息事寧人。



「我係！」只見阿南興奮咁舉起手，笑容滿面咁認頭。估唔到，因為揀嘅科差唔多嘅關係，我同佢又有機會同班。但佢而家已經唔同當初寂寂無名嘅新同學，佢臉上嘅果份自信，已經同中一入學果時截然唔同。



「睇你嘅樣都肯做班長㗎啦。」Miss Lam講。



「冇問題！」阿南好爽快咁講。







「咁男班長呢？」



結果冇人舉手，我特登縮埋一舊，希望Miss Lam隨便點嘅時候唔會點中我。



「Miss Lam！」突然，有三個人舉手，Miss Lam眼神即刻充滿希望。