《想溝到女千祈唔好學我咁》: 1.4

「Hello，我想問...我係咪有咩問題啊？」坐到埋去之後，個女仔即刻苦曬面咁問我。

見住佢想喊嘅樣，我當堂嚇一跳。

「咩...咩問題啊？」我苦笑咁問。

「咁點解你好似好抗拒坐過嚟？」佢仍然扁曬嘴咁問。

「我...同佢哋熟啲先想同佢哋坐之嘛，哈哈...」果兩聲哈哈當然係隔硬加上去。

果年我升上中一，我哋學校係一間一條龍嘅中學，好多學生都係由小學部直升上去，當然亦有啲由其他學校轉過嚟。所以好多人喺開學日已經有一班玩開嘅朋友。阿星佢哋三個同我，更加係小學一年班就識嘅朋友。

「係咪㗎...？」

「係啊，哈哈。」今次仲要加個唧上去嘅尷尬笑容。

「咁就好喇！」佢臉上即刻一百八十度轉變，變到滿臉笑容。

「我叫歐陽南！我哋做朋友啊！」佢伸出手，諗住同我握手。

從來未掂過女仔手仔嘅我即刻心跳加速，手心冒汗。但我好明白係一種恐懼，而唔係一見鐘情嘅怦然心動。

「李卓正。」幾番掙扎下，我先勉強同佢握手，並報上姓名。

「李..卓..正..咁橋口嘅，有冇第二個名啊？」

「冇。」

「英文名呢？有喇掛？」

「Ry…Ryan。」如果有時光機，我一定返去摑自己兩巴，講個英文名都講到口窒窒，正廢柴。

「咁叫你壞人喇就！」

「你鐘意喇！」睇住果三個賤人笑淫淫嘅樣，搞到我都唔係好想理歐陽南。

「你好，壞人！」啱啱仲係想喊嘅樣，轉個頭就喜上眉稍，女人真係恐怖同善變...

唔通係我嘅錯覺？佢嘅熱情同第一眼見到嘅果份寂寞好唔同。


「喂，壞人！李卓正！」突然俾南南推一推，先發現，原來自己不經不覺沉溺咗喺大家初次見面時候嘅場景。

「呆咗咁做咩？」





「冇…冇啊，飲咗啲酒個人吽吽哋之嘛。」呢個已經係我今日講過嘅第三個大話。

「Party都未開始咁快就醉？」阿星幫我掩飾。

「喂，你哋過嚟食嘢啦！」好快，阿雄已經放到成檯都係食物，大家都埋曬位圍住食飯檯。

「為大家仲有機會聚頭飲杯！」阿雄一嚟就講，一直以來，佢都好重視每一次嘅聚會，每一次都盡量出席，所以即使係自己嘅訂婚派對，首先慶祝嘅，係大家可以保持呢一份嚮往相聚嘅心。

「上次咁齊人都已經係五年前…」講嘢嘅係洛賓，但話未講完，佢好似已經發覺自己講錯嘢。由細到大，佢好似永遠都會喺錯嘅場合講一啲錯嘅嘢。其實每次聚會，都好大機會可以齊人，但呢五年嚟，缺少嘅都只係南南。

「彈開啦你！一嚟就亂咁噏。」阿星對洛賓講，每當洛賓講錯嘢，我哋就會叫佢彈開，咁佢就會乖乖收聲。

「對唔住囉！離開香港咁耐！我自隊一杯！」喺大家都陷入尷尬嘅時間，南南主動打破悶局咁講。佢永遠都係最顧及所有人感受嘅人，會盡力令所有身邊嘅人開心，當初嘅我，都係因為呢一份善良，而感受到佢嘅與眾不同。