《想溝到女千祈唔好學我咁》: 1.3

「喂。」正當我哋諗住出門迎接，阿星指一指我衫領，我先發現一個Maggie留低嘅唇膏印。

「你仲話有排先到嘅？」阿星問喺門口除緊鞋嘅阿柔。

「我以為塞車嘛，點知機場出嚟好快。」

「機場？去機場做乜？」我問。

「咳咳！可唔可以俾我入咗門口先！」阿柔身後浮現一把聲線，一把熟悉嘅聲線。佢嘅出現令我好似Hang咗機咁望住咗門口。





「欸南南，入嚟啦，我幫你攞行李。」阿星講。

佢每行一步，我嘅心就跟住跳動...五下左右。我知自己呢刻好想搵個窿捐埋，偏偏雙腳就釘實咗喺地下咁。

我曾經幻想過無數次同佢重逢嘅時刻，但我無諗過會係而家，原來係會咁措手不及。

「H...Hi，好耐冇見。」直至面對佢嘅一剎，先吞吞吐吐咁打咗聲招呼。

「嗯，好耐冇見，壞人。」





「啱啱落機？我都唔知你嚟添。」

「主人家都唔知㗎，得阿柔同阿星知。」佢微笑住咁講，一臉從容，同僵硬曬嘅我好大對比。

「話要比個驚喜嘉慧喎！頭先喺樓下爭啲搞到準新娘暈低。搞到接機都係得我一個人接！」阿柔搭嘴。

「係啦係啦，最辛苦係你啦！」咁多年嚟，佢把聲仍然係咁清澈無暇，即使多添一份成熟。

記得好多年前，佢亦都係用同一把聲線，同我打招呼。





「鈴...鈴...鈴」中一嘅開學日，隨住課堂鐘聲響起，班主任都入到嚟。當佢諗住閂埋個門果陣，出面突然有人推住咗個門。

「等陣！」

「好彩趕得切。」有個男仔揹住Nike書包，喘曬氣咁跑入嚟。冇錯，正是小弟。

「第一日翻學就遲到？快啲搵個位坐低啦！」

「Miss唔好意思，對唔住！」我雙手合十低曬頭咁道歉。

「搞錯啊，唔留翻個位俾我！」我行咗去一堆男仔果邊，但見到已經冇曬位。

「鬼叫你遲到啊！坐果到啦，仲有一個位。」講嘢嘅就係阿星，佢同洛賓已經坐埋一齊，阿雄亦都坐咗喺佢地隔離嘅單邊位。

「What...我唔要同女仔坐！」見到落單嘅位置隔離坐住個陌生嘅女仔，我即刻細細聲咁同佢哋講。





「唔走喎吹咩！」佢哋異口同聲咁講。

「仲唔搵位坐？」到班主任出聲，別無他法之下，我唯有硬住頭皮行過去。

「嘻嘻嘻！」見住佢哋三個古惑嘅笑容，我就知係佢哋嘅詭計。

當我一直行過去，我略略打量咗一下呢個女仔嘅外貌。一頭長長秀髮被橡筋束起，形成令所有少年為之若狂嘅小馬尾。皮膚潔淨白皙，臉腮微微泛紅，淡而幼嫩嘅雙眉之下有一對黑白分明嘅大眼睛。但眼神間充斥住一份難以理解嘅淡漠，即使係充滿稚氣嘅秀麗臉孔亦喺輕皺嘅眉宇間感受到一份死寂。