《想溝到女千祈唔好學我咁》: 1.2

「間酒店可以聽日12點先Check Out，你可以休息吓。」

「你趕時間？」望住佢可憐兮兮嘅眼神，似喺到挽留緊我。

「嗯，有對朋友就嚟結婚，所以要去聚一聚。」

「咁好啦…再見喇。」

「再見。」





喺煙花易冷，紙醉金迷嘅繁華城市，男同女之間嘅關係可以建築喺愛、性、甚至利益上。充滿安慰同歡愉嘅一夜情，似乎比一段呃呃騙騙嘅關係更加珍貴、罕有。

「喂！李卓正！又遲到！」唔洗半個鐘，我已經由充滿格調，但冷冰冰嘅酒店，去到一間設計簡陋，但充滿溫暖嘅屋，為嘅係出席一個訂婚派對。一對準新人都係我由細識到大嘅好友。

一去到，已經俾主人家點名斥責。

「對唔住雄哥！慧姐！唔係唔係！雄嫂！我自隊一杯先。」

「搞咩咁遲啊！」準新郎阿雄扮詐型咁問。





「你老哥大日子要襯返件靚衫先到啊嘛。」講就緊係咁講啦，唔通話啱啱大戰完咩。

「你坐陣啦，我同阿慧去攞外賣先，洛賓喺樓下等緊。」

我坐咗喺沙發，一邊輕嚐酒杯上嘅紅酒，釐清一下思緒。好快，我已經放低咗頭先同Maggie一齊嘅時候嘅感覺，或者同類型嘅事情發生喺我身上已經太多次，與其話麻木咗，倒不如話已經變得收放自如。

「嗯，幾時嚟？」一把熟悉嘅男聲喺我後面響起，係阿星，我死黨之一。

「啱啱到。你呢？」





「到咗好耐啦，頭先去廁所。」

「估唔到啊可，當初最水火不容嘅一對，竟然可以共諧連理。」我講。

「你都得㗎，係你自己放棄姐。」阿星答，對住我心底最深嘅痛處講。一講返起往事，大腦嘅保護機制好似突然撻著，引導我將手中嘅酒一飲而盡，逃避阿星嘅回應。

「你仲未面對倒。」見我冇回應，阿星繼續講。

「面唔面對倒有咩關係，都唔會再見。」我支吾以對。

「說話唔係咁講啊。」講到一半，門外傳出開門聲，係主人家返嚟，後面仲有頭先提起嘅洛賓，仲有個叫阿柔嘅女仔。