別人名字，我的姓氏(上集): 23. 準備開始友誼賽

友誼賽即將開始，對手好簡單，係薄扶林某間友校，實力唔強

我被安排到同F.2隊到比賽，呢一班隊友，我同佢地係完全冇夾過

比賽開始，由於我未同佢地夾過，所以我唔知應該打邊個位

自由人已經有人企左，主攻擊手又已經有人，所以我變左係到夢遊球場咁

第一球，對方打過黎





本常係有隊員擋波，再升俾我黎個攻擊

不過今日完全係兩回事

我退後準備接二傳，放棄左防守

同時間，F.2嘅姐姐同我做同一動作，即係兩個人同時放棄防守位置

呢一球好自然咁，對方落地得分





我地大家妳眼望我眼

第二球，同第一球相反，大家都想去救波

不過到最後一刻大家都誤會讓左，又失一分

如是者，我係F.2隊中嘅問題開始浮現

默契不足、欠缺支援，即使平日係F.1組到打得幾好，到左今日，我就好似變左個負累咁





去到第13分，教練將我換落場，由另一個F.2姐姐補上

好快，F.2隊遵就重整左陣腳，開始反擊

呢一局，佢地好快就將失落嘅分數追返

第二局，我繼續坐係場邊睇F.1組比賽

出奇地佢地冇我係陣中，都打得唔差。莫非我係球隊中係多餘嘅角色?

「Jasmine，妳睇到d咩?」小龍女係我身邊問我

我唔係盲嘅，我自己一落到F.2果邊，表現就好似隱左形咁

不過一向自尊心好重嘅我，開唔到口講出黎





「呢…呢層…」

「F.1組一向以妳為重心，所以妳先可以打得咁順」

我低頭冇聲出

「妳有嘅係技術，妳係F.1技術毫無疑問係住組第一，甚至F.2同3都搵唔到人比得上妳。但係排球唔係桌球同高爾夫球，妳冇可能一個人去打對方6個」

「係…」

「妳自己睇下F.1隊友，佢地冇左妳，唔代表一定會輸」

比分上，我地咬住對方兩分之內，正如小龍女所講，球隊冇左我唔代表一定會輸。之前就係佢地太依賴我，所以俾左個錯覺大家，F.1組唔可以冇左我呢個球員





我坐係到望住其他隊友打波，佢地愈打愈順

「Jasmine妳仲想唔想出場?」小龍女係我身邊問

「唔出啦，等大家試下冇左我都打得好順」

其實都唔係好順，有時佢地都有小誤會

不過佢地應該唔洗我落場

去到半場，佢地索哂大氣咁坐低，個個滿頭大汗

「點呀?對方如何呀?」

「同我地…差…差唔多…」已經有人抖緊大氣咁講





「唔係嘅，只要妳地加強合作，就可以贏到對方」

小龍女係佢地身邊講戰術，而我都係佢地身邊聽

下半場即將開始

小龍女下達左命令

「Jasmine妳落場」

我聽到小龍女咁講就望一望佢，佢知我心入邊諗咩

「落場，妳咁聰明，妳應該知我想妳點打嘅」





其他隊員都望住我，但係我顯得唔想落場

Annabelle行過黎捉一捉我隻手

「落場啦，唔洗驚喎」

「但係…」

之後佢係我耳邊講「妳係大白鯊個姪女黎，怕其他人有牙咩?係唔係呀虎鯊」

虎…虎鯊?

俾Annabelle咁講一講，我再用姑姐個招牌動作，揈一揈個頭，扎好馬尾

「出場啦!!!」果一刻好有姑姐嘅氣勢

就連其他Form嘅師姐都認同

「佢好似大白鯊」

仲有

「Jasmine原來有d胸」

Annabelle行過黎我身邊，打左我屎忽一下
 
「放鬆放鬆」
 
我地開波，對方依舊擋完再二傳向我地發起進攻
 
今次我地隊員好有默契咁擋波再二傳
 
當Annabelle升波，個波未飛到最頂時
 
我一個扣殺過對面場區
 
係一個in波，好快就將呢一分拎到手
 
對方將個波回過黎，呀…應該係殺過黎
 
之前嘅我一向係成碌木咁種係到等波打反擊
 
但係今場嘅我呢…
 
「退後!!!妳上前!!!」我係到命令其他隊員
 
「係…」佢地好聽我嘅指揮，等我一個退去擋波，佢地自己就準備反擊
 
我一下擋波再順勢set俾Annabelle
 
然後Annabelle再set去攻擊位
 
一殺
 
我地又拎到一分，當時大家開心到攬埋一舊
 
我地呢班F.1妹開始成形，唔會單單以我一個為中心咁打波
 
係呢一場友誼賽中，我地開始發揮各人嘅長處
 
對方開始睇穿我地嘅戰術，所以開始對我嘅扣殺有所防範
 
佢地派左D比較高嘅隊員黎攔網，於是，我地又改變進攻方法，由後排攻擊
 
雙方係呢場友誼賽互有攻守，我地成功打出左一場好好睇嘅比賽
 
完場後，大家圍埋係到傾返比賽細節以及檢討
 
終於，我發現自己已經融入左球隊之中