沙頭角與長洲的距離(重修版): 四十四.

我踎喺佢身邊：「係咪唔得？」

可能佢仆完街之後醒返啲，發現自己冇想像中咁勁，扤咗下頭就伸咗隻手出嚟：「拉我起身。」

我捉住佢隻手，一嘢扯佢起身：「搭住我。」

佢好聽話咁搭住我，但都用咗一陣先企得穩。

我睇咗睇錶：「你住邊？」





「咪長洲囉。」佢撳住心口：「行啦，搭的士應該仲趕到尾班船。」

我帶住佢一步一步咁行到去的士站，一架紅的都喺呢個時候嚟到我面前。

我拉開車門，佢彎低腰準備上車，然後…

「嘔！」

佢嘔嗰下我即刻閂返車門再撳佢個頭埋嚟，所以架的士一滴都冇掂到，而我就成身都係。





「屌你啊！咪撚上車啊，成身嘔吐物，一間整污糟我架車！」的士佬鬧完就踩油走。

真係…

唉，算啦，咁都好過嘔落架的士到，嘔落架的士到嘅話冇返五百一千都搞唔掂。

但係而家都唔係點算，成身污糟曬，的士又搭唔到，其他又趕唔切。

「而家點搞啊小姐？」我問佢。





「附近有間酒店可以Walk in，你送我過去。」佢拎電話出嚟比我睇。

我睇完個地址之後就收埋佢部電話，過咗陣就送到佢去酒店。

講就講話係酒店，事實上就係賓館，仲要喺樓上。

我上到去同個櫃台交涉咗一陣，終於送到佢入去。

佢一入房就攤咗上床，而我就企喺門口將佢部電話揼上床：「我走喇。」

「喂！」佢嗌停我：「你唔洗下件衫先？」

喺我諗住拒絕佢嘅時候，佢已經扯緊鼻寒。

「返掂佢都瞓咗，洗埋先走都無所謂啦。」





我除衫行入廁所，用洗手液捽甩啲嘔吐物，之後就用風筒吹返乾少少。

好彩我著返工件衫好易乾，如果唔係吹到聽朝都唔掂。

喺我著返好件衫行出廁所嗰陣，佢喺門口一嘢飛撲埋嚟，成隻樹熊咁掛喺我身上面。

好彩我下盤夠穩，如果唔係就仆到戇鳩鳩。

但係…咩料啊？