[中六續集][愛情][懸疑？]擁抱，失憶(重修版): 四十四.

我伸咗個懶腰，睇咗睇右下角嘅時間，原來已經五點幾，啊晴都收咗工，應該差唔多返到嚟。

摸咗摸個肚，原來都開始有啲肚餓。

雖然我淨係寫咗少少，不過…

食飽先有力寫嘢架嘛！

搵埋啊晴食個靚Tea加夜晚，返嚟再寫過。





我撥個輪過去，佢都即刻聽咗。

「仲以為你放假會瞓到我返嚟添。」佢偷笑咗聲。

「我邊會啊？你老屈！嗚…」我扮喊。

「唔知邊個企喺到都瞓得著呢？」佢打咗個喊露：「嗰個人好似叫…」

「向晴。」我停頓咗一下：「個男朋友，即係林晉武我。」





「認咗佢咪好囉。」

「唔想認都唔得。」

「咁我返嚟嘅時候買埋上嚟？」

「唔好啦，又要你揹，我返衫落嚟啦。」

「咁你要快啲喎。」





「吓，解解啊？」

「我快過你，就你請架喇喎。」

「咁大鑊？你到邊啊？」

「轉個彎到，終點係魚蛋粉鋪張地氈。」

「一定快過你！」

「快啦，Bye！」

佢收咗線，而我都即刻衝去換衫。

我連頭都唔梳，就咁求其換咗條短褲加件T-Shirt就踢拖衝出門口。





我嚟到魚蛋粉鋪嗰條街嘅街頭，一望過去就見到啊晴棟咗喺魚蛋粉鋪門口，仲喺到點緊煙。

囂到你呢，真係未聽過咩係龜兔賽跑。

我交叉腳跳咗下，好似跑Online爆氣咁一嘢衝出去。

既然佢食緊煙，點都唔會快過我，所以我決定停喺佢隔離串佢幾句先。

「食緊煙啊？入邊唔比食煙架喎。」我抆大曬個嘴、伸曬脷咁：「我行先喇！」

講完，我就轉身準備行入去。

「睇、住、啊！」佢大嗌。





「我唔會中計架。」

「Black Devil two thousand喎。」

咩話？係我最鍾意但香港好難搵到嘅Black Devil two thousand！？

「真定假啊？」我轉身。

佢右手高舉一包煙，上面大大個紅色骷髏頭，真係Black Devil two thousand嚟！

你條友竟然出暗黑兵法，我係…

絕對會受。