[中六續集][愛情][懸疑？]擁抱，失憶(重修版): 四十.

佢鬆開我，再摑一巴，之後「哼」咗聲就轉身走。

「Yes，又賺咗巴！」我細聲咁歡呼。

「我聽到架！」佢背住我舉咗個中指：「你唔快啲諗辦法氹返我，我就呢個禮拜都唔摑你！」

一聽到佢話一個禮拜唔摑我，我即刻追咗上去。

因為無咗佢摑我，我係絕對搞唔掂架！





但跑到一半，我停低咗。

其實，習慣下又何嘗唔係一件好事。

雖然話就話紅棍係一個可行嘅解法，而我都有英倫啊伯嚟幫手。

再者，我都已經知道咗到底係邊個喺背後搞事。

然而，而家發生緊嘅事由一開始已經超出咗我可以理解、可以努力嘅範圍。





我唯一可以靠嘅，就只得英倫啊伯，我再努力都冇幫助。

我拎資訊嘅唯一途徑，就係英倫啊伯把口，我無辦法自己去理解。

所有嘢都係嚟自英倫啊伯，但英倫啊伯比啊晴質問完一輪之後，我覺得…

佢都未必可信。

就算佢拍曬心口，甚至拎曬所有證據出嚟證明佢係幫我都好，我都會懷疑，因為所有嘢都超出咗我可以理解嘅範圍。





連佢係咪真係幫我都唔知，枝紅棍嘅功效係咪真係如佢所講就更加唔知。

當一切都唔肯定嘅時候，我又何德何能去改變命運？

點解，我可以咁廢？

到底，我哋呢段關係係咪真係格硬嚟？

我踎低，將自己個頭埋起嚟。

呢十年，我咩都做唔好。

呢十年，我咩都比唔到啊晴。

十年後嘅今日，我連佢要被人造嘅命運帶走都阻止唔到。





十年前係龍叔，十年後係英倫啊伯。

我唔想冇咗佢，但…

我可以點做？

啊晴踎喺我身邊：「唔摑你一個禮拜啫，洗唔洗咁唔開心啊？」

「唔係啊，肚痛。」我顎高頭：「你而家摑我一巴可能就唔痛架喇。」