[中六續集][愛情][懸疑？]擁抱，失憶(重修版): 四十一.

「雖然同你一齊咗十年，但我從來冇同你講過我個名有咩意思。」佢摸咗摸我個頭：「你想唔想知？」

「梗係想啦！」我皺眉：「但乜原來你個名有意思架？」

「有架，係我啊媽諗出嚟。」啊晴伸手：「起身先啦，坐低慢慢講。」

佢拉咗我起身，然後嚟到隔離嘅長凳坐低。

「你講啦。」





「向晴，即係向住晴天，所有黑暗都只會喺我後面。」佢掹走身後花槽嘅一條草，再舉高：「而晴拆開就係日同青，即係太陽同青草。」

「原來係咁，我仲以為係個晴字好公廁，所以你啊媽就跟風用個晴宇。」我望住個天：「不過而家夜晚，睇唔到個太陽。」

佢反咗個白眼：「比我扮下得意都唔得，嬲死你！」

「扮咩啫？」我搭住佢膊頭。

佢目露兇光，𥄫到我實一實，懷疑準備喺唔知邊到掹把暗器出嚟送我落去搵閻王。





我摵住佢面珠墩：「你原本就咁得意，唔洗扮。」

上一秒應該仲密謀緊點殺咗我嘅佢，而家笑到好似啪咗春藥咁。

「咁你原唔原諒我啊？」我挨塊面過去。

「唔原諒喎。」佢擰轉面：「而家比你講兩句就唔嬲，嫁咗比你之後變工人都似。」

「咁你點先唔嬲啊？」我用個頭抆佢：「晴晴公主想我做啲咩啊？」





「嗯…」佢托住下巴：「我諗到喇！」

「啊！」

講完佢就一嘢Chok咗頭個返嚟，下巴就咁一嘢插咗落我頭頂。

「Sorry啊！」佢摸住我個頭：「痛唔痛啊BB？」

「都幾架，不過你講啦。」

「聽晚陪我去行海旁。」

「行海旁咁簡單？」我懷疑佢傻咗：「咁益我？」

「梗係冇咁簡單啦傻佬。」佢個嘴挨埋嚟我耳邊，用蚊滋嘅聲量講：「喺屋企玩狗帶就試過，但係…」





我即刻彈開：「你唔係諗住…」

佢雙眼發光，笑到見牙唔見眼，對住我大大力咁扤頭：「係啊！」