[中六續集][愛情][懸疑？]擁抱，失憶(重修版): 三十八.

「屌你啊！」英倫啊伯嬲到走音：「同你講咗幾時用架！」

「Sorry囉，唔知點搵你啊嘛。」我摸咗摸塊面。

「咁你哋搵我做咩？」

我指住啊晴：「佢唔信你。」

「點解？」英倫啊伯有啲詫異：「實屬少見，但你係啊晴，所以都唔意外。」





「我哋又唔知你係邊個，做咩要信你？」啊晴連環發炮：「點知你哋係咪扯貓尾。」

「我從來都冇諗過要幫佢。」

「我呢啲老人家好鍾意講一句嘢…」佢清咗清喉嚨：「寧教人打仔，莫教人分妻。」

「呢個係大部分人啫，我點知你係咪？」啊晴再次質問。

「你啲女人真係…」英倫啊伯比佢激到有啲氣喘：「我幾時害過你哋啊。」





「好似又真係冇。」啊晴望向我：「你有冇？」

「我冇啊。」

「咁咪係囉。」

「暫且信住先。」啊晴望返去英倫啊伯到：「咁點解係啊澄？」

「恐怖情人。」英倫啊伯講咗個唔同嘅答案出嚟。





「恐怖情人？但係啊澄已經係十年前嘅事。」啊晴皺曬眉咁望向我：「即係你…」

我估佢想講我仲有同啊澄來往，但英倫啊伯打斷咗佢：「佢冇，純粹係君子報仇特別遲。」

「佢有冇癲到記仇記成十年啊？」

「佢一開始都咁執着，但喺某件事之後就執着起嚟。」

「邊件事之後？」依家輪到我質問佢。

「呢層，Er⋯」佢似乎有口難言，Er咗好耐。

係我準備開聲追問嗰一剎那，佢突然伸手指住我哋後面：「你睇吓嗰邊！」

喺我哋望過去嘅時候，佢用rapper嘅速度講咗句嘢：「你哋唔好問咁多啦，總之我係嚟幫你地架！」





我哋聽到佢咁講就知有啲唔對路，即刻擰返過去，但可惜佢已經變返做烏鴉飛走咗。

望住飛走嘅烏鴉，我哋同一時間屌咗出聲。