《我老婆唔係我女朋友》【那些年／九十年代學界／真人】 第七章全新中篇！: 【後記】 廿五年後（１０）
口旱旱於是我將剛才馬飛所講嘅工作壓力講返畀老婆聽：「人人都話IT難做呀。」
「唓～邊行唔難做啫，做人比上不足，比下有餘，無病無痛就夠啦，知足常樂呀。嘿，馬飛條粉皮教壞我老公，阿仔話呀，你呢啲大叔剩係識得呻嘅叫『廢中』呀。」老婆經常跟我都有不同看法。不過不知道是不是嫁狗隨狗、近朱者赤，這些年她的談吐都愈來愈「豪邁」了。
「哎呀老婆，叫咗妳唔好咁講嘢啦，一陣個仔學埋晒啲衰嘢呀。」我想起我個姊妹讀書時成日話我口不擇言，教壞細路。
她俏皮的嗡嗡鼻：「佢老竇教我嘅，叫佢自己問老竇點解囉。」
「哎…」少女時她已經是這樣，有衰嘢就瀨我教壞佢。不過老婆的「活潑可愛」到今天做了人哋老母，仍與讀書時無異。「呀～今朝forward畀你嗰單似曾相識呢，好似個樓主真係俾人拉咗喎。」現在才有空提起今早挑起我心事的po。
老婆開懷笑道：「哈哈，我以前無報警拉你都算畀面啦。嗱，作為多謝我放你一馬，呢餐點計都應該你請喎。」一派皇恩浩蕩、大赦天下的氣勢。