《我老婆唔係我女朋友》【那些年／九十年代學界／真人】 第七章全新中篇！: 【後記】 廿五年後（４）
「誒…我老婆怕生保嘛，你又唔識佢。噉我又得罪人多，咪費事搞囉。」我這段標準答案這些年都跟很多朋友說過了。
奇怪「窮隠」的我，竟然有學費和水腳去英國升學嗎？不過這又是另一個故事了。至於我是否食到洋妞兼養番狗？下面自有分曉。
「係呢，你對孖囡點呀。」都係帶開話題先，無謂等佢再追問我老婆嘅嘢。
我老婆呢，她最怕應酬，又唔鍾意人講佢，所以畢業後跟同屆同學幾乎斷絕來往，如果唔係同是IT狗，我都未必會喺Solution Fair啲公眾場合撞返馬飛。
一提起佢兩條囡，馬飛即時變腰果眼幸福滿載的模樣，有女初長成噃，梗係曬命曬到青光眼啦。忙不迭的掏出手機畀相我睇，又話兩條囡似老母咁靚呀，又話兩條囡下年去加拿大讀書，好擔心兩條囡俾仔溝呀，總之就父愛滿瀉，心心多到有啲眼冤。
馬飛你都天生外父相啦，可能好快做外公添，呵呵呵。
噢，話說馬飛個老婆，即係兩條囡嘅老母就是蘇菲，是呀，「蘇妃」娘娘！天知道佢地點樣搞埋一齊，可能又玩K歌情緣2.0，反正以前同學之間的離離合合，移燈換凳都司空見慣了，無必要深究。
講講下又講到工作。「唉～以前成日話『前世做錯事，今世入魯殿』，我諗住魯殿轉過去好啲啦，原來只係十八層去咗十七層。而家？『薄餅佬，就死得早，畸寶佬，變白卡佬』。好隱難做呀，日日俾人捽數捽到皮都甩呀。」馬飛呻到花兒也謝了，兩間陀地龍頭電訊他都做過。