《我老婆唔係我女朋友》【那些年／九十年代學界／真人】 第七章全新中篇！: 【後記】 廿五年後（３）
今天是2019年大除夕，一般公司都會放早，而我間公司仔更是無王管，事關老闆在大陸有頭家長駐。
我心下在盤算，嗯～既然係噉，索性食完飯就唔返公司了。於是跟大家說一聲就逕自早走，話晒經理仔都是經理吖，係可以有啲特權嘅。
坐港鐵去尖東站，上到M19朝廷，一入大廳已經見到「戴眼鏡鄭T瑞」，非常熱情地揮著手：「喂～呢度呢度。」條友咁多年後仍然好似上堂一樣，大力招手叫我埋位。
年長了的馬飛，添了點灰髮，現在要戴眼鏡了，但身材仍無大走樣，反觀我已是頂著啤酒肚的肥佬了；在【簿餅】位居Sales VP的他，自然身光頸靚，就是大除夕的便服日也穿著三件頭西裝，而我卻是U記羽絨、牛仔褲還要加條冷頸巾。
「嘩～使唔使又羽絨又頸巾呀。」馬飛怪叫著。
「唉～年紀大喇，成日沾寒沾凍，又鼻敏感。喂，唔好叫太多嘢呀，我陪你食咋，而家飲啖水都話三高，等陣約咗老婆下午茶呀。」我不得不留肚，一陣俾老婆知道我午飯都食雙份，實煎我層皮搾油。
「得啦，志在出嚟吹下水啫。話時話我都未見過你老婆喎，當年聽你話去完英國讀書，返嚟就結婚，鬼妹嚟架？喺外國搞大咗？神神秘秘又唔請飲。」馬飛一輪嘴連珠炮發。