《我老婆唔係我女朋友》【那些年／九十年代學界／真人】 第七章全新中篇！: 【後記】 廿五年後（５）
「門小你咩，香港做IT邊個唔死啫，我哋Infra狗咪又係日日好似做地盤噉。」做外判Project幫客起場，不啻做地盤三行，日日出入工地機房。
「喂唔係喎，聽講做iBank撈紅色資本都𠶧喎。」馬飛忽發奇想。
「做銀行？你好似無聽過【大貓銀行】年年裁員，個Task List第一項，一定係去IT層樓開無雙mode㗎喎，血流成河洗到乾乾淨淨為止。」一日IT，尤其在香港，一世都係IT狗，實在是中佬的悲歌。好似啲連登仔噉一畢業就做iBanker，先係真正人中之龍ヽ人生勝利組。
說著說著，我看看時間差不多4點半了，跟馬飛說：「喂走喇，約咗老婆呀。」
「你無揸車呀？我兜埋你啦。」馬飛一向都揸車返工，聽講公司有津貼，上市公司高層係多啲福利嘅，不過阿高層都是揸架寶馬5系，派頭仍比不上連仔嘅馬莎拉蒂。
仲有同馬飛出去食飯唔使「扮」去廁所或無帶銀包㗎，同佢講AA制直情係侮辱佢，疊埋心水等佢找數就得，佢有Entertainment Allowance嘛。
「哦～去創紀喎。」我約了老婆在觀塘下午茶。
「得啦，一路開車可以繼續傾嘛，都未傾夠。」條友讀書時已經「有如滔滔江水連綿不絕」。
由尖東揸車去觀塘，加上大除夕全港公司早退的交通混亂，塞車塞了一個多小時。