《我老婆唔係我女朋友》【那些年／九十年代學界／真人】 第七章全新中篇！: 【第八章】 海角紫霞（１）
海角紫霞
阿腸待眾人到齊後再度開腔。「唏，枱上嘅食物同飲品稍後各位自便嘞，想飲啤酒就要自費喇，合作社除咗啤酒外，滷水雞脾、雞翼同鹵水蛋都係名物，不妨一試喎。大家見到嘅枱、凳甚至看台石級都可以隨便坐，總之你想大圍一齊玩或者二人世界，悉隨尊便。我循例提提大家，泳池雖然無鎖，但因為無救生員當值，唔建議大家落去游水，不過如果覺得太熱，都可以喺池邊浸浸腳嘅，但都要以小心為上。泳池頭方向就係東北方，夜啲睇流星雨就係嗰個方向喇。」
Lulu在我耳邊輕聲駁嘴：「喂，我哋有救生員喎。」激得我想打她。
阿腸繼續說：「合作社啲姐姐會喺11點收工，所以有需要就早少少搵佢哋幫手，11點後會由我哋幹事接力招呼，當然無咁熟手喇。好嘞，唔阻大家食嘢先，等一陣我哋仲會有啲集體遊戲，如果未有睇星partner嘅，記得踴躍參加喇。」
燒烤時李博士走了過來跟我說：「一陣呢佢哋多數會喺呢度泳池邊或者天台睇星嘅。嗱，我就介紹你帶埋女朋友去『海角紫霞』嗰邊睇，有面對正北方嘅無敵海景，非常啱今晚睇英仙座呢。」果然有額外關照。
「啊～遠唔遠呢？」看星我真的無興趣，寧願靜靜的跟阿心獨處，我非常想念以前她和我到公園按摩的日子。
「呢度行10分鐘左右啦，帶支電筒慢慢行就得，我以前都係同老婆去嗰度睇星。」李博士輕鬆的回應。