《我老婆唔係我女朋友》【那些年／九十年代學界／真人】 第七章全新中篇！: 【第八章】 觀星（３）
「咳～再次多謝各位參加今晚晚會，大家應該都對觀星有啲認識喇呵？不如我哋先畀啲掌聲李博士，多謝佢今晚咁精彩嘅講解。」一輪掌聲和李博士謙辭兩句後，阿腸繼續說：「嘿，接住由身為外事嘅小弟講講燒烤晚會嘅安排嘞，剛才入嚟BF大樓時，唔知大家有無留意，泳池旁邊有一家好似小食店嘅舗仔呢，佢就係我哋嘅合作社嘞，平日我哋飲飲食食都會幫襯佢哋嘅，今晚我哋請佢哋幫呢個晚會準備咗燒烤食品，等一陣請移玉步去到小食店外我再講解。呀，指南針、電筒呢啲觀星工具我哋會放喺呢度，一陣有需要可以自己上嚟攞㗎。」
一行人再次浩浩蕩蕩操落樓，好彩幾層樓啫，如果唔係上上落落都幾攰（我比賽完唔使再操體能了，加上天氣又熱，所以等閒都是慢慢磨，行得慢過耆英，避免出汗），落樓期間我斜眼望到Lulu又著嗰條為咗去世紀約會而買嘅溝仔戰裙，兩條光管般魔腿非常耀眼。
「喂妳個癡線妹，夜晚多蚊就唔好著短裙啦。」我忍不住又哦她兩句。
「哈，唔使擔心喎，我頭先噴咗蚊怕水啦。今日唔使著運動衫，梗係要show吓quali嘛。」Lulu一臉得戚的辯護。
阿心在旁邊問我：「呢條裙就係你兩個陪佢去買㗎？」我點點頭。「嗯～估唔到你兩個男仔之家都幾好taste喎。」
嘿，我覺得自己最有taste就係「慧眼識村姑」（不過有可能其實係佢溝我都未定啫），我自然不敢隨便說出來，只笑笑說：「使乜講！」
從地庫後門出去室外一個休憩空間，前面向下走兩級就是泳池了，那家合作社就在後門旁邊，由於店面不大，只見門前放了幾張枱，上面已經預備了燒烤食材、飲料和燒烤叉，再遠一點就見到有幹事正為幾個立地式燒烤爐「起爐」。